د ژمي موسم په رانږدې کېدو، د تخار د خواجه بهاءالدین ولسوالۍ بې ځایه شوي په ناوړه وضعیت کې، په پرانیستې فضا کې تر خېمو لاندې ژوند کوي.
هغه ویډیويي پيغام چې د سیمې یوه اوسېدونکي د آمو ټلویزیون خبریال ته رالېږلی، ښيي چې د تخار په خواجه بهاءالدین ولسوالۍ کې بېځایه شوي په نامناسب وضعیت کې ژوند کوي او ډېری شپې وږي بيده کېږي.
![](https://amu.tv/wp-content/uploads/2022/11/photo2086433924.jpg)
یو شمېر بېځایه شوي وايي، له هغې وروسته چې له خپلو کورونو بېځایه شوي، هېڅ بنسټ تراوسه د دوی پوښتنه نه ده کړې او په بد وضعیت کې دي.
دغه بېځایه شوي زیاتوي: «که زموږ وضعیت ته پام ونه شي، زموږ کوچني ماشومان، پلرونه او زړې میندې د سړې هوا او لوږې له امله ژوند له لاسه ورکوي.»
![](https://amu.tv/wp-content/uploads/2022/11/photo2086433708-1024x576.jpg)
د ویلو ده چې څه موده مخکې ۴۰۰ کورنۍ د تخار ولایت د خواجه بهاءالدین ولسوالۍ له بېلابېلو برخو د هغو کسانو له خوا چې د هېواد له ختیځو او سویلي سیمو او د پاکستان له وزیرستانه ورغلي وو او ددغو سیمو د ملکیت ادعا یې لرله، له خپلو سیمو په جبري توګه ایستل شوي وو.
دا په داسې حال کې دي چې کابو یوه میاشت مخکې، د طالبانو یو پلاوی ددغو اختلافاتو د اواري په موخه ګمارل شوی او دغه پلاوي پرېکړه کړې وه چې د دواړو ښکېلو لوریو د مشرانو ترمنځ له ناستې وروسته به د سیمې اوسېدونکو ته ددغو سیمو په بدل کې د کورونو جوړولو لپاره ځمکې ورکړل شي.