ننګرهار کې د طالبانو د رسنیو دفتر خبر وايي چې په تورخم ښارګوټي کې له پاکستان څخه په جبري ډول راستنېدونکو کورنیو سره د خوراکي او غیر خوراکي توکو د مرستو لړۍ پیل شوه.
د رسنیو دفتر وایي، دا مرستې د جرمني د یوې مرستندویه موسسې له لوري په «عمري کمپ» کې پر هغو کورنیو وېشل کېږي چې تازه هېواد ته راستنې شوې دي.
دفتر زیاتوي په دغو مرستو کې چې د هرې کڅوړې ارزښت ۹۴ امریکايي ډالره دی؛ اوړه، غوړي، لوبیا، بوره، وریژې، چای او کمپلې شاملې دي.
د ننګرهار د اقتصاد رئیس مولوي جان محمد حامد د دغو مرستو د وېش پر مهال له نورو نړیوالو موسسو هم وغوښتل چې په دې سختو شرایطو کې د راستنېدونکو افغانانو لاسنیوی وکړي او خپلو مرستو ته دوام ورکړي.
له پاکستان څخه د افغان کډوالو جبري اخراج په داسې حال کې جریان لري چې په وروستیو نږدې دوو کلونو کې، افغانستان له ګاونډیو هېوادونو، په ځانګړې توګه له پاکستان څخه د کډوالو د اخراج د بې ساري زیاتوالي شاهد دی.
ملګرو ملتونو تر دې وړاندې اعلان کړی و چې په ۲۰۲۵ میلادي کال کې، شاوخوا ۲.۶ میلیونه کډوال افغانستان ته راستانه شوي دي.
دغه سازمان مخکې خبرداری ورکړی و چې په لویه کچه دا راستنېدنې، د افغانستان پر محدودو سرچینو او د مرستې رسونې پر وړتیاو باندې دروند فشار راوړي.
