د امریکا د کورني امنیت وزیرې کریسټي نوئم، د ډونالډ ټرمپ له لیدنې وروسته اعلان کړی چې هغه په هر هغه هېواد «د پراخ سفر بندیز» سپارښتنه کړې؛ چې د ده په باور امریکا ته «خطرناک مهاجرین» لېږي.
نوموړې پر خپلې اېکس پاڼې لیکلي:
ما همد اوس له ولسمشر سره ولیدل، زه پر ټولو هغو لعنتي هیوادونو د بشپړ او پراخ سفر بندیز لګوم، چې زموږ هیواد له قاتلانو، وینه زبېښونکو او پر ټولنیزو مرستو روږدو کسانو ډکوي.
کریسټي نوئم زیاته کړې ده:
زموږ نیکونو دا هېواد په خپلو وینو، خولو او ازادۍ سره د نا پایه مینې پر بنسټ جوړ کړی، نه د بهرنیو یرغلګرو لپاره چې زموږ اتلان وژني، په سختۍ سره زموږ د مالیاتو لاسته راغلي ډالر خوري او هغه څه چې موږ یې باید د خپلو امریکایانو د هوساینې لپاره وکړو، دوی یې راڅخه وتروړي.
