د برېټانیا حکومت وايي چې د پناه غوښتنې په پالیسۍ کې د لویو اصلاحاتو په هدف به د بشري حقونو د قوانینو تفسیر بدل کړي، څو په ناقانونه توګه ور رسېدلي کډوال په اسانه ایستل ممکن شي. ټاکل شوې چې دغه بدلونونه د دوشنبې په ورځ د کورنیو چارو وزیرې شبانه محمود له لوري اعلان شي.
صدراعظم کایر سټارمر ویلي چې نوې تګلاره به د بې پایه استینافونو مخه ډب کړي، د وروستۍ شېبې ادعاوې کمې کړي او د هغو کسانو د ایستلو بهیر به چټک کړي چې په برېټانیا کې د پاتې کېدو قانوني حق نه لري. حکومت ادعا کوي چې د اروپايي بشري حقونو د کنوانسیون د کورنۍ د ژوند حق (ماده ۸) ډېری وخت د ایستلو د ځنډولو لپاره کارول کېږي، او اوس به یې تعریف یوازې نږدې کورنۍ پورې محدود شي.
په طرحه کې دا هم شامل دي چې د پناه غوښتونکو حقوق لنډمهاله شي او دایمي استوګنې ته د رسېدو موده څلور برابره اوږده شي. دا ګامونه په داسې وخت کې اخیستل کېږي چې حکومت د غیرقانوني کډوالۍ، په ځانګړي ډول د وړو کښتۍ د راتګ، د مهارولو له ستونزو سره مخ دی.
سره له دې، د خیرښیګړې ادارې دغه سخت دریځ غندي او وايي چې دا بدلونونه به هغه خلک زیانمن کړي چې مخکې یې هرڅه له لاسه ورکړي دي. خو سټارمر ټینګار کوي چې برېټانیا به د زغم او عدالت ارزښتونه وساتي، خو خلک باید د خوندي پولو ډاډ ولري.
