د افغانستان د کریکت ملي لوبډلې د زېمبابوې پر وړاندې د درې شلاووریزو سیالیو لړۍ په بشپړ بریا (۳–۰) سره پای ته ورسوله. افغان لوبډلې د لړۍ وروستۍ لوبه د یکشنبې په ورځ په هراره سپورټس کلپ کې د ۹ منډو په توپیر وګټله.
د افغان توپوهونکو چټکه لوبه
افغانستان د پچې له ګټلو وروسته توپوهنې وکړه او په ټاکلو ۲۰ اوورونو کې یې د ۳ ویکټو په ورکولو سره ۲۱۰ منډې جوړې کړې.
رحمانالله ګربز د لوبې غوره لوبغاړی و، چې په یوازې ۴۸ توپونو ۹۲ منډې وکړې، پکې یې اته څلوریزې او پنځه شپږیزې ووهلې، او د نږدې ۱۹۲ سټرایک رېټ سره یې د زېمبابوې توپاچوونکي تر سخت فشار لاندې راوستل.
ابراهیم ځدراڼ هم ښه ملګرتیا وکړه او په ۴۹ توپونو ۶۰ منډې جوړې کړې، په داسې حال کې چې صدیقالله اتل د اننګز په وروستیو کې په یوازې ۱۵ توپونو ۳۵ ناسوځېدلې منډې وکړې.
د زېمبابوې له توپاچوونکو څخه یوازې سکندر رضا و، چې د څلورو اوورونو په بدل کې یې ۲۰ منډې بې له ویکټې ورکړې او یو څه اقتصادي توپاچونه وکړه. نور توپاچوونکي، لکه ریچارډ نګراوا (۴–۰–۴۰–۱) او براد ایونس (۴–۰–۳۳–۲) د افغان توپوهونکو د برید پر وړاندې کمزوري ښکارېدل.
زېمبابوې تر وروستي اووره جګړه وکړه
زېمبابوې د هدف د تعقیب پر مهال ښه پیل وکړ او تر وروستي اووره یې هڅه وکړه، خو ټولې لوبډلې په ۲۰۱ منډو وسوځېدې.
کپتان سکندر رضا په زړه پورې لوبه وکړه او په ۲۹ توپونو ۵۱ منډې وکړې، چې پکې اووه څلوریزې او دوه شپږیزې شاملې وې. برایان بېنېټ ۴۷ منډې (په ۳۱ توپونو) وکړې، راین برل ۳۷ (په ۱۵ توپونو)، او تادیواناشه ماروماني ۲۸ (په ۱۷ توپونو) وکړې.
د افغان توپاچوونکو زړورتیا
که څه هم لوبه ډېره زیاتې منډې لرلې، خو د افغانستان توپاچوونکو خپل حوصله وساتله.
فضلالحق فاروقي په خپلو څلورو اوورونو کې ۲ ویکټې د ۲۹ منډو په بدل کې واخیستې، چې پکې د کپتان رضا او موسکیوا مهمې ویکټې شاملې وې.
مجیبالرحمن او فرید احمد هم دوه دوه ویکټې ترلاسه کړې.
عبدالله احمدزي د وروستیو شیبو مهمه توپاچونه وکړه او د بېنېټ او تی. مپوسا په سوځولو سره یې د لوبې برخلیک وټاکه.
زېمبابوې په وروستیو شاوخوا لسو اوورونو کې خپل اووه ویکټې د یوازې ۷۵ منډو په بدل کې له لاسه ورکړې.
اړوند خبرونه
