یو شمېر خبریالانو چې نه غواړي نومونه یې څرګند شي، «آمو» ته ویلي چې په افغانستان کې ګڼ سیاسي او پوځي شنونکي له «امنیتي دلایلو» له امله له کورنیو رسنیو سره د مرکو او تلویزیوني څرګندونو ډډه کوي.
دغو خبریالانو ویلي، دوی په وروستیو ورځو کې له څو سیاسي او نظامي شنونکو سره د مرکو لپاره اړیکې نیولې، خو هغوی د بېلابېلو پلمو په وسیله له خبرو کولو انکار کړی دی.
یو خبریال ویلي: «آن هغه کسان چې پخوا په پرلهپسې ډول د تلویزیوني مناظرو برخه کېدل، اوس وایي نه غواړي د خپلو څرګندونو له امله د طالبانو له خوا له ستونزو سره مخ شي.»
دا راپور په داسې حال کې خپرېږي چې درې بېلابېلو سرچینو «آمو» ته ویلي، د سیاسي چارو افغان شنونکی سلیم پیګیر د تلې په ۱۷مه (پنجشنبه) په کابل ښار کې د خپل کور مخې ته د ناپېژاندو وسلهوالو له لوري په ډزو ټپي شوی دی.
سرچینو زیاته کړې، ښاغلی پیګیر له برید وروسته روغتون ته لېږدول شوی دی.
طالبانو تر اوسه د دغه برید او د شنونکو پر وړاندې د احتمالي ګواښونو په اړه څه نه دي ویلي.
