د ملګرو ملتونو د عمومي اسامبلې د ۸۰مې غونډې په څنډه کې، د روسیې، چین، ایران او پاکستان تر منځ یوه څلور اړخیزه غونډه ترسره شوه چې پکې د افغانستان د روان وضعیت په اړه خبرې وشوې.
د روسیې د بهرنیو چارو وزیر سرګي لاوروف وویل: “زه تمه لرم چې مونږ به د افغانستان پر وضعیت، چې ډېر ژر بدلون مومي، نظریات تبادله کړو.” نوموړي زیاته کړه: “زموږ ترمنځ پخوانی ډیالوګ تل ګټور ثابت شوی، او زه ډاډه یم چې نن به هم موږ یو بل ته خپل نظریات څرګند کړو او د راتلونکو ګامونو لپاره به یو لوری وټاکو.”
دا غونډه د تړلو دروازو تر شا ترسره شوه او تر دې دمه د بحثونو دقیق جزئیات رسنیو ته نه دي وړاندې شوي، خو د څلورو هیوادونو ګډونوالو تمه ښودلې چې دا ډول مشورتي ناستې به د افغانستان په اړه د یو ګډ سیمهییز دریځ په جوړولو کې مرسته وکړي.
افغانستان له ۲۰۲۱ کال راهیسې، چې طالبان یو ځل بیا واک ته رسېدلي، له اقتصادي ستونزو، بشري بحران، او د نړیوالې انزوا له ننګونو سره مخ دی. سیمهییز هېوادونه هڅه کوي چې د افغانستان وضعیت له نږدې وڅاري او د یو باثباته او ټولشموله حل لپاره همغږي رامنځته کړي.
د څلور اړخیزې غونډې ګډونوال هېوادونه، چې ټول د افغانستان ګاونډیان یا مهم سیمهییز لوبغاړي دي، دا باور لري چې د افغانستان ثبات نه یوازې د افغانانو لپاره، بلکې د ټولې سیمې د امنیت، اقتصادي پرمختګ او ترهګرۍ ضد مبارزې لپاره حیاتي اهمیت لري.
