د طالبانو حکومت د تازه بدلونونو په لړ کې د اطلاعاتو او فرهنګ پخوانی وزیر ملا خیرالله خیرخواه د میدان وردګو والي وټاکل شو او د هغه پر ځای، د لغمان پخوانی والي شیخ شېر احمد حقاني، د اطلاعاتو او فرهنګ نوی وزیر ټاکل شوی دی.
د طالبانو د حکومت ویاند ذبیحالله مجاهد ویلي چې د دې ډلې مشر، هبتالله اخوندزاده، په یو شمېر دولتي او پوځي ادارو کې د نوو چارواکو د ټاکلو حکم صادر کړی دی.
د تازه بدلونونو له مخې:
- د لغمان پخوانی والي شیخ شېر احمد حقاني د اطلاعاتو او کلتور وزارت د وزیر په توګه وټاکل شو.
- د اطلاعاتو او کلتور پخوانی وزیر ملا خیرالله خیرخواه د میدان وردګو والي شو.
- د میدان وردګو پخوانی والي قاري محمد بختیار معاذ د لغمان والي وټاکل شو.
- د ۳۱۳ مرکزي قول اردو پخوانی مرستیال ملا محمد حافظ مجاهد د فراه والي شو.
- د فراه پخوانی والي مولوي غوثالدین رهبر د ۳۱۳ مرکزي قول اردو مرستیال شو.
- د ۲۰۵ البدر قول اردو اړوند دوهمې پلي لواء پخوانی قومندان قاري محمد نسیم عزت د جوزجان مرستیال وټاکل شو.
- د کابل ښار د درېیمې امنیتي حوزې پخوانی آمر حاجي شېرعلي جندالله د پکتیا امنیه قومندان شو.
- د ۲۰۹ الفتح قول اردو د لومړۍ پلي لواء پخوانی قومندان ملا عبدالشکور بریالی د ۲۰۵ البدر قول اردو د دوهمې پلې لواء د قومندان په توګه وټاکل شو.
- د جوزجان پخوانی مرستیال مولوي نورالدین د ۲۰۹ الفتح قول اردو د لومړۍ پلې لواء د قومندان په توګه وګومارل شو.
- د پکتیا پخوانی امنیه قومندان مولوي محمد عمر مخلص د کابل ښار د درېیمې حوزې د آمر په توګه ټاکل شو.
ذبیحالله مجاهد زیاته کړې چې دغه بدلونونه د ادارو د لا اغېزمن فعالیت او د چارو د ښه همغږۍ لپاره ترسره شوي دي؛ خو شنونکي پر طالبانو انتقاد کوي چې دا ډول بدلونونه یوازې د یوې محدودې کړۍ په منځ کې راڅرخي، او د هېواد د سیاسي مشارکت، ټولنیز تنوع او مسلکي وړتیاوو پر ځای د جګړهییزو اړیکو او شخصي وفادارۍ پر اساس ترسره کېږي.
