د پاکستان بهرنیو چارو وزارت ویاند، شفقت علی خان وايي، چې د دغه هېواد د کورنیو چارو وزیر، محسن نقوي د سفر اساسي اجنډا امنیتي او ترهګرۍ ضد مسایل وو.
هغه د پنجشنبه په ورځ خبریالانو ته وویل چې د دواړو خواوو ترمنځ اړیکې په دوامداره ډول مثبته خوځښت لري او د اړیکو کیفیت په څرګنده توګه ښه شوی دی.
هغه وویل: «د کورنیو چارو وزارت له امنیتي او د ترهګرۍ ضد چارو سره سروکار لري، چې دا موضوعات د دواړو هېوادونو ترمنځ د اجنډا یوه مهمه برخه جوړوي. موږ بیا بیا څرګنده کړې چې له افغانستان سره څنګه ډول اړیکې غواړو. خو له بده مرغه یو له اساسي خنډونو څخه هلته ترهګرو ته ورکړل شوې پناهځایونه دي.»
هغه له جزییاتو ورکولو پرته وویل، چې د دواړو لوریو تر منځ تخنیکي خبرې روانې دي.
شفقت علی خان زیاته کړې، دواړه خواوې په مثبت ډول ښکېلې دي، او د امنیت په برخه کې همکاري باید د دواړو لوریو ترمنځ د اړیکو د ښهوالي او مثبت پرمختګ په عمومي چوکاټ کې وکتل شي.
شفقت علی خان زیاته کړې: «په یادو شویو سفرونو کې، نه یوازې د کورنیو چارو وزیر په کچه، بلکې په سیاسي کچه هم، په افغانستان کې ترهګرو ته ورکړل شوې پناهځایونه یو مهم بحث و. پر دې موضوع خبرې روانې دي، او دا د دواړو هېوادونو ترمنځ د منظمې خبرې اترې یوه برخه ده.»
د پاکستان د کورنیو چارو وزیر، محسن نقوي د چنګاښ په ۲۹مه کابل ته راورسېد.
د طالبانو د کورنیو چارو وزیر، سراجالدین حقاني، د پاکستان د کورنیو چارو له وزیر، سید محسن نقوي، سره په لیدنه کې ټینګار کړی چې د دواړو لوریو ترمنځ د دوهاړخیزه اعتماد فضا رامنځته کول، د شته ستونزو د حل لپاره اړین رول لري.
په دې ناسته کې، چې د دواړو هېوادونو د چارواکو د پلاوي په ګډون ترسره شوې، حقاني د پاکستاني پلاوي سفر افغانستان ته “یوه ارزښتناکه موقع” بللې، چې د دوهاړخیزو اړیکو د پراختیا او همکاریو د پیاوړتیا لامل کېدای شي.
