د نړېوال کډوالو د ورځې د لمانځنې په مناسبت، اروپایي ټولنې یو ځل بیا ژمنه وکړه چې په افغانستان، ایران، پاکستان او د منځنۍ اسیا په یو شمېر برخو کې له میلیونونو بېځایه شویو افغانانو څخه به ملاتړ ته دوام ورکړي.
د اروپایي ټولنې ماموریت په افغانستان کې، د جمعې په ورځ په خپره شوې اعلامیه کې ویلي، چې دغه اتحادیه کډوالو، بېرته راستنېدونکو او داخلي بېځایه شویو کسانو ته مرستې برابروي او په ځانګړي ډول د دوی د خوندیتوب، زدهکړې او دوامداره معیشت په برخو کې تمرکز لري.
په اعلامیه کې راغلي: «د کډوالو د نړیوال سازمان سره د ۴۷ میلیونه یورو د شراکت په چوکاټ کې، اروپایي ټولنه افغانانو ته د روغتیايي خدماتو، زدهکړې، دندې موندلو او قانوني خوندیتوب ته د لاسرسي زمینه برابروي. دغه نوښت د مېرمنو او زیانمنونکو قشرونو ملاتړ ته ځانګړی پام کوي، او همداراز هغو کوربه ټولنو ته هم مرسته برابروي چې د پراخو بېځایهکېدو له امله اغېزمنې شوې دي.»
اروپایي ټولنې همداراز د ملګرو ملتونو له کډوالو له عالي کمېشنرۍ سره خپله همکاري یاده کړه، څو افغان کډوالو او داخلي بېځایه شویو لپاره اوږدمهاله حللارې پراخې کړي.
دا هڅې په بېلابېلو ولایتونو کې ښځو ته د رهبري لاندې اقتصادي پروګرامونو، انرژۍ او خدمتونو ته د لاسرسي پراخولو ته دوام ورکوي.
دغه اعلامیه په داسې حال کې خپرېږي چې لا هم میلیونونه افغانان د اقتصادي بحران او سیمهییزو ناورینونو له امله له سختو شرایطو سره مخ دي. اروپایي ټولنه وایي، دوی هڅه کوي له دغو بېځایه شویو ټولنو سره مرسته وکړي، څو د زغم وړتیا یې لوړه شي، او یو څه ثبات او هیله ورته ور وګرځي.
