په یوه ورځ کې تر ۱۸۰ زیاتې افغان کډوالې کورنۍ له پاکستان او ایران څخه په زوره او په خپله خوښه ویستل شوې او هېواد ته راستنې شوې دي.
د طالبانو تر ادارې لاندې باختر آژانس خبر ورکړى، چې په تېره يوه ورځ (دوشنبه، د غويي ٣١) له دغو دوو هېوادونو څخه ١٨٧ کډوالې کورنۍ ايستل شوې دي.
د دغه راپور له مخې، دغه راستنې شوې کورنۍ د کندهار، ننګرهار، نیمروز او هرات ولایتونو له لارو هېواد ته داخل شوي دي.
د طالبانو تر ادارې لاندې د دغه خبري آژانس د راپور پر بنسټ، ۱۸ کورنۍ د تورخم او ۲۱ کورنۍ د سپین بولدک له لارې هېواد ته داخلې شوې دي.
په ورته وخت کې ۸۰ کورنۍ په نیمروز کې د پل ابرېشم له لارې افغانستان ته او همدا راز ۶۸ نورې کورنۍ دهرات اسلام کلا له لارې افغانستان ته راستنې شوې دي.
دا په داسې حال کې ده، چې پاکستان د افغان کډوالو د جبري ایستلو دویم پړاو پیل کړی او ایران هم د دغو کډوالو د ایستلو بهیر چټک کړی دی.
