د بریتانیا پخوانی لومړی وزیر ډیویډ کامرون د بریتانیا د بهرنیو چارو وزیر په توګه ددغه هېواد دولت ته ورستون شو. دا کار د خپل مقام د پياوړي کولو لپاره د بریتانیا د لومړي وزیر ریشي سوناک د هڅو یوه برخه بلل شوې ده.
د ښاغلي سوناک دفتر دوشنبې اعلان وکړ چې کامرون به بېرته دولت ته ورستون شي.
دا د هغو پراخو بدلونونو یوه برخه ده چې د بریتانیا د لومړي وزارت له دندې د سوئلا براورمن د ګوښه کېدو لامل شول او جیمز کلورلي یې پر ځای وګمارل شو.
کامرون په ۲۰۱۶ کال کې د برګزیت رفرنډم له ماتې وروسته له خپلې دندې استعفا وکړه، خو د راپورونو له مخې په ۲۰۱۸ کال کې یې خپلو دوستانو ته د سیاست لومړۍ لیکې ترجیحاً د بهرنیو چارو د وزیر په توګه ستنېدو ته لېوالتیا ښودلې وه.
کامرون له هغه وخت راهیسې لږ د رسنیو په وړاندې راڅرګند شوی. هغه تېره میاشت د بیرمنګهم او منچستر ترمنځ د «اچ ۲ اس» د ګړندي ریل ګاډي د لغوه کولو لپاره د سوناک پر پرېکړې په نیوکې سره وویل: «موږ په ناسم لوري روان یوو.»
ښایي دا ټاکنه د محافظه کار ګوند د ښي پالو نارضایتي راوپاروي، په تېره بیا دې ته په پام سره چې د کامرون وروستی مهم اقدام په اروپايي ټولنه کې د پاتې کېدو لپاره ناکام کمپاین و.
