د شمالي کوریا مشر کیم جونګ اون وايي، که امریکا له دې شرطه تېر شي چې پیونګ یانګ باید خپلې اټومي وسلې ختمې کړي، د خبرو لپاره هېڅ خنډ نه شته. خو هغه ټینګار کړی چې هېواد به یې هېڅکله د بندیزونو په بدل کې له خپل اټومي وسلواله ځواک نه تېرېږي.
کیم د یکشنبې په ورځ د ولسي مشرانو مجلس ته په وینا کې وویل: «که امریکا د اټومي وسلو د له منځه وړلو غیرمنطقي ټینګار پای ته ورسوي او د سولې ریښتینی لوری غوره کړي، موږ د خبرو کولو لپاره چمتو یو.»
هغه زیاته کړه چې د شمالي کوریا بقا د اټومي وسلو په لرلو پورې تړلې ده، ځکه د امریکا او سویلي کوریا ګډ پوځي تمرینونه د ده په وینا د اټومي جګړې د تمرین بڼه لري.
کیم څرګنده کړه: «نړۍ ښه پوهېږي چې امریکا له هغو هېوادونو سره څه ډول چلند کوي چې خپلې اټومي وسلې پرېږدي. موږ به هېڅکله خپلې اټومي وسلې ورنه کړو. دا موضوع به د تل لپاره د خبرو محور نه وي.»
د سویلي کوریا ولسمشر لي جي میونګ ویلي، کلونو بندیزونو د شمالي کوریا د اټومي پروګرام مخه نه ده نیولې، بلکې ستونزه یې نوره هم زیاته کړې. د هغه په وینا، پیونګ یانګ هر کال تر ۲۰ پورې نوې اټومي وسلې زیاتوي.
لي ټینګار کړی چې د خبرو بیا پیل ستونزمن دی، خو د اعتماد جوړونې پر بنسټ یوه تدریجي تګلاره د ستونزې د حل یوازینۍ عملي لاره ده. هغه زیاته کړه چې په دې برخه کې د امریکا د ولسمشر ډونلډ ټرمپ رول کلیدي دی.
