په ارزګان کې ځینې کسب کاران او د خوراکي توکو پلورونکي وايي چې په دې ولایت کې د اقتصادي ننګونو او بې کارۍ د زیاتوالي له امله، د دوی کاروبار هغسې ښه نه دی لکه څنګه چې پخوا و.
دوی همداراز ټینګار کوي چې ورځنی عاید یې هم په جدي توګه کم شوی دی. عبدالکمال د ارزګان په یوه برخه کې په کار بوخت دی. وايي چې نن ورځ یې یوازې ۳۰ افغانۍ ګټلې دي.
نوموړی ټینګار کوي چې د ارزګان د خلکو اقتصادي ننګونې مخ په زیاتیدو دي، او د هغه کاروبار هغسې بریالی نه دی لکه څنګه چې پخوا و.
عبدالمالک وايي: «زما د کاروبار حالت ښه نه دی، خلک له اقتصادي ستونزو سره مخ دي او پیسې نه لري. زه د هر کس ویښتو جوړولو په بدل کې ۳۰ افغانۍ اخلم، له سهار راهیسې تر اوسه یوازې یو کس راته راغلی، یعنې ټول ورځ مې یوازې یو مشتری درلود، هېڅ کار نشته.»
سربیره پر دې، د ارزګان د دې بازار په یوه بله برخه کې، یو خیاط هم د اقتصادي ستونزو په اړه خبرې کوي او ټینګار کوي چې د هغه ورځنی عاید په جدي توګه کم شوی دی.
د ارزګان اوسېدونکی، خیبر، وایي: «یو جوړه کالي چې راته راوړي، مجبوره یم په ۷۰ یا ۸۰ افغانیو یې جوړ کړم. د خلکو اقتصادي وضعیت ډېر خراب دی او هېڅ اقتصادي توان نه لري.»
په ورته وخت کې، د ارزګان په دې برخه کې د خوراکي ځینې پلورونکي هم ټینګار کوي چې خلک د اقتصادي ستونزو له امله لږ پیرود کوي.
د اورزګان یوه بل اوسېدونکي، ولی، وویل: «دا دوکان مو جوړ کړی، یو کس راځي یو کیلو اوړه اخلي، بل راځي نیم کیلو وریجې اخلي، همداسې د خلکو اقتصادي وضعیت ډېر سخت دی.»
له دې سره، په ارزګان کې ځایي سرچینې ټینګار کوي چې په دې ولایت کې بې کاري زیاته شوې او خلک په ډېرې سختۍ سره کولی شي چې خپلې مالي اړتیاوې پوره کړي.
د ارزګان سربیره، د هیواد په نورو برخو کې هم د اقتصادي ننګونو او د بیکارۍ د زیاتوالي په اړه جدي اندیښنې شتون لري.
د هیواد اوسیدونکي له نړیوالې ټولنې او ملګرو ملتونو غواړي چې په دې سخت اقتصادي وضعیت کې افغانان له پامه ونه غورځوي.
