د امریکا ولسمشر جوبایډن یو ځل بیا له افغانستانه د امریکايي ځواکونو د وتلو د پرېکړې دفاع کړې او ویلي یې دي چې تاریخ به یې د سم اقدام په توګه یادوي.
بایډن د پنجشنبې په ورځ په پنټاګون کې په مخه ښې وینا کې ويلي چې که څه هم له افغانستان څخه د ځواکونو د ایستلو پرېکړه «سخته»وه؛ خو اړین او مناسب ګام و.
بایډن همداراز د افغان همکارانو په ایستلو کې د مرستې په ګډون د امریکا له پوځ څخه مننه وکړه، ویې ویل: «زه باور لرم چې تاریخ به وښيي چې دا سمه پرېکړه وه؛ خو پوهیږم، پوهیږم چې دا سخته وه. د وتلو پرمهال د وژل شويو په ګډون له لسیزو راهیسې ستاسو د وروڼو او خویندو له لاسه ورکولو وروسته درد لاهم ریښتینی و.»
د ولسمشر په وینا، په افغانستان کې د امریکايي ځواکونو د تلفاتو شمېر د ده د کاري مهالویش د ورځني لومړیتوبونو د یوې برخې په توګه ثبت او تعقیبېده.
هغه وويل: «هره ورځ، زه يې اوس هم له ځانه سره انتقالوم، هره ورځ، په خپل ورځني کار کې.د ورځني مهال وېش په سر کې، له هغه وخت راهیسې چې زه دلته راغلی یم، په افغانستان کې د امریکايي پوځیانو د ورځني تلفاتو شمېر ثبت شوی دی ۲زره ۴۶۵ وژل شوي او ۲۰زره ۷۶۸ ټپیان شوي دي.»
د امریکا د دفاع وزیر لویډ آسټن هم ویلي چې بایډن په افغانستان کې د امریکا تر ټولو اوږده جګړه پای ته ورسوله.
هغه وايي: «داسې جګړه چې د څلور ولسمشرانو تر دورې یې دوام وکړ. بل ولسمشر ته یې له سپارلو ډډه وکړه. هغه پوهېده چې زموږ مثالي ځواک زموږ د ځواک له بېلګې ډېر مهم دی.»
متحده ايالات له ۲۰ کلونو وروسته د ۲۰۲۱ کال په اګست میاشت کې له افغانستانه ووتل. که څه هم د متحده ایالاتو د ځواکونو وتل د سیاستوالو او د کانګرېس غړو سختې نيوکې راپارولې؛ خو بایډن تل دا یوه لویه لاسته راوړنه بللې ده.
