د متحده ایالاتو ولسمشر جو بایډن د متحده ایالاتو کریسټوفر ډوناهو په اروپا کې د متحده ایالاتو د پوځ د مشرۍ لپاره د نوماند په توګه د سنامجلس ته ورپېژند؛ خو دغه مجلس د هغه د ترفيع مخه ونیوله.
ګارډین راپور ورکړی چې د ښاغلي ډوناهو نوم د پنجشنبې په ورځ د شاوخوا زرو کسانو په لېست کې نه و چې د سنا مجلس د وسله والو خدماتو کمېټې لخوا تاييد شو.
د راپور له مخې، ۵۵ کلن جنرال کریسټوفر ډوناهو له افغانستانه د امریکا د وتلو پرمهال وروستی سرتېری و چې افغانستان يې پرېښود.
د سنامجلس دا اقدام په داسې حال کې کېږي چې اېن بي سي نیوز د سرچینو په حواله ویلي چې د امریکا منتخب ولسمشر ډونلډ ټرمپ له افغانستانه د هغو پوځي پرسونل د محاکمې په لټه کې دی چې له افغانستانه په وتلو کې ښکېل دي او د هغه انتقالي ټیم د پوځي افسرانو، سرتېري او جنرالان یو لېست چمتو کوي.
د ترفيع د مخنيوي دلیل
ګارډین وايي، د اوکلاهاما جمهوري غوښتونکي سناتور مارکواین مولين، چې د کریسټوفر ډوناهو د ترفيع مخه نيولې، تبصره نه ده کړې؛ خو د امریکا پوځی وېبپاڼې د سنامجلس د مرستیالانو په حواله ویلی چې دا غوښتنه د ډونلډ ټرمپ د انتقالي ډلې له خوا شوې ده.
د خدمت پس منظر
د دفاع وزارت ویاند وايي، «جنرال ډوناهو په ویسټ پواینټ کې د متحده ایالاتو له پوځي اکاډمۍ څخه فارغ شوی او له ۳۰ کلونو څخه زیات یې خپل هېواد ته خدمت کړی دی.» د هغه ټاکل په اروپايي سیمه کې په خورا حساس وخت کې ترسره کېږي. موږ د سنا له مجلسه غوښتنه کوو چې زموږ ټول وړ نوماندان تاييد کړي. زموږ د نوماندانو ردول زموږ پوځي چمتووالی کمزوری کوي.»
کریسټوفر ډوناهو په يو عکس کې چې د ليد د يوې دستګاه لخوا په شپه کې اخيستل شوى و له افغانستان څخه د وتلو پرمهال په وروستۍ الوتکه کې د پورته کېدو په حال کې وليدل شو. هغه بیا د ٨٢ هوایی ځواکونو قومنده پرغاړه درلوده.
ښاغلی ډوناهو دوه ستوريز جنرال دی، او دا ترفیع چې اوس په واشنګټن کې وړاندیز شوې، هغه ته څلورم ستوری چې د سولې د وخت په اردو کې ترټولو لوړ رتبه ده، ورکول کېدله.
