په یوه ورځ کې څه باندې ۳۰۰ افغان کډوالې کورنۍ له ایران او پاکستان څخه ویستل شوې او هېواد ته راستنې شوې دي.
د طالبانو تر ادارې لاندې باختر اژانس په یوه راپور کې ویلي، چې پرون (سه شنبه د وږي ۲۷مه) له ایران او پاکستان څخه د هېواد ۳۲۲ کډوالې کورنۍ «په جبري او اختياري ډول» ویستل شوې دي
د دغه راپور له مخې دغه کډوال د ننګرهار، قندهار، او هرات ولايتونو له پولو څخه هېواد ته داخل شوي دي.
د طالبانو تر ادارې لاندې دغه دولتي اژانس وايي چې ۵۵ کورنۍ د تورخم او ۵۵ کورنۍ د سپین بولدک له لارې افغانستان ته راستانه شوي دي.
په همدې حال کې د دغه راپور پر بنسټ، ۹۷ کورنۍ د پل ابرېشم له او ۱۱۵ نورې کورنۍ د هرات د اسلام کلا له لارې هېواد ته داخلې شوې دي.
دا په داسې حال کې ده، چې د ایران د پيشوايي ښار قوماندان اکبر عربی خبرداری ورکړی چې افغان کډوال به توقیف، راټول او وشړل شي.
هغه ټینګار وکړ چې له ایران څخه د پې اسناده کډوالو د راغونډولو او ویستلو پلان عملي کول په شدت سره دوام لري.
د ايران د پیشوايي ښار قوماندان له اېسنا خبري اژانس سره په خبرو کې زیاته کړه چې د دغه هیواد د اتباعو له خوا د بې اسناده کډوالو ګمارل هم سرغړونه ده او عاملينو سره به يې قانوني چلند وشي.
په ورته وخت کې پاکستان هم د افغان کډوالو جبري ايستلو ته دوام ورکړی دی.
