سرچینو آمو ته تایید کړې چې د پاکستاني چارواکو یو پلاوی له طالبانو سره د سرحدي تاو تریخوالي او د تحریک طالبان پاکستان اړوند مسٸلو د خبرو لپاره کندهار ته تللی دی.
د دغه پلاوي د جوړښت په اړه جزیات نه دي په ډاګه شوي.
د سرچينو د معلوماتو له مخې، دا سفر د يکشنبې په ورځ ترسره شوى، چې په ترڅ کې يې پلاوي له يو شمېر سيمه ييزو طالب چارواکو سره ليدلي دي.
تر دې وړاندې هم په سرحدي سیمو کې د طالبانو او پاکستاني پوځیانو ترمنځ څو ځلې نښتې شوي دي. په دغو نښتو کې چې د وږي په میاشت کې وشوې، پاکستاني رسنیو ویلي چې د طالبانو اته غړي وژل شوي او ۱۶ نور ټپیان شوي دي.
د پاکستان حکومت ویلي، چې طالبانو تحریک طالبان پاکستان ته په دغه هېواد کې د دې ډلې پټنځايونو په ورکولو سره په پاکستان کې د بریدونو زمینه برابره کړې ده، خو طالبانو دا څرګندونې رد کړې او دا یې د پاکستان کورنۍ مسٸله بللې ده.
دا په داسې حال کې ده چې د ملګرو ملتونو څارونکې ډلې په یوه راپور کې ویلي چې د تحریک طالبان پاکستان شاوخوا شپږ زره ٥٠٠ جنګیالي په افغانستان کې حضور لري.
