د پاکستان لومړي وزیر شهباز شریف د طالبانو تر واک لاندې افغانستان د«ترهګرۍ سرچینه» وبلله.
که څه هم طالبان په کراتو په افغانستان کې د ترهګرو ډلو شتون رد کړى دى او په دې وروستیو کې د دوی د کورنیو چارو وزیر سراج الدین حقاني په کابل کې د یوې غونډې په ترڅ کې په هېواد کې د داعش شتون رد کړ او ویې ویل چې د دوی تر واک لاندې افغانستان نورو هېوادونو ته ګواښ نه دی.
د یوې ویډیو له مخې چې د پاکستاني رسنیو له خوا خپره شوې، ښاغلي شریف پرون (چهرشنبه،زمري ۳مه) په یوه غونډه کې چې د هغه د کابینې غړي هم پکې حاضر ويلي: «د یوه ګاونډي هیواد (اشارتا افغانستان) له خوا ترور په هیڅ صورت د منلو وړ نه دى.»
هغه په دې ناسته کې زیاته کړې چې په پاکستان کې بریدونه د يوې«تنظيم شوې دسیسې» له مخې ترسره کېږي.
شهباز شریف په پاکستان، په ځانګړې توګه په بلوچستان او خیبر پښتونخوا کې د«ترهګریزو» بریدونو د زیاتوالي په اړه هم اندېښنه څرګنده کړې، او ويلي يې دي، چې دا ډول پیښې «له مخکې پلانېږي».
ښاغلي شریف همداراز ويلي، چې تحریک طالبان پاکستان (ټي ټي پي) په ٢٠٢٢ کې د دغه هېواد د حکومت سره د اوربند له وړانديز ردولو وروسته په پاکستان کې د بریدونو په تنظیمولو کې لاس لري.
پاکستاني چارواکو تر دې مخکې افغان طالبان د ټي ټي پي په ملاتړ تورن کړي او ویلي یې دي چې د طالبانو تر واک لاندې افغانستان کې ټي ټي پي پټنځایونه لري چې له هغه ځایه په پاکستان کې بریدونه تنظیموي.
خو طالبانو د دوى تر واک لاندې افغانستان کې د پاکستاني طالبانو د غړو شتون رد کړی دی.
دا په داسې حال کې ده، چې د داعش، القاعدې او طالبانو پر فعالیتونو د ملګرو ملتونو د څار ډلې په دې وروستیو کې ویلي چې د طالبانو تر واک لاندې افغانستان کې د پاکستاني طالبانو د جنګیالیو شمېر ۶زره۵۰۰ ته رسېږي.
