پاکستاني رسنیو راپور ورکړی، چې له پاکستانه د بېاسناده افغان کډوالو د ایستلو په دوام تېره ورځ (د لیندۍ ۲۷) یو زر او ۵۸۳ کډوال له دې هېواده ایستل شوي دي.
دا شمېر د تېرې ورځې د یو زره او ۶۰۰ تنو په پرتله چې راستانه شوي وو، یوه اندازه کمښت ښيي.
دا کډوال د تورخم او سپین بولدک پولې له لارې بېرته افغانستان ته راستانه شوي دي.
په دې لړ کې د طالبانو د کډوالو چارو وزارت ویلي چې د دوشنبې په ورځ (د لیندۍ ۲۷) ۸۱۳ کډوال افغانستان ته راستانه شول.
دغه وزارت جوته کړې چې ۸۹ کورنۍ، په ټولیز ډول ۴۵۳ تنه د تورخم دروازې له لارې راستانه شوي دي، په داسې حال کې چې ۶۰ کورنۍ، ۳۱۰ تنه د کندهار د سپین بولدک له لارې بېرته هېواد ته راغلي دي.
د پاکستاني رسنیو شمېرې ښيي، چې د نومبر میاشتې له پیل راهیسې، په ټوله کې ۴۳۸ زره او ۳۷۶ بېاسناده افغان کډوال له دې هېواده ایستل شوي دي.
