د فلیپين په سویل کې د یوه پوهنتون په ورزشي سالون کې د چاودنې له امله لږترلږه درې تنه مړه او ۹ نور ټپیان شول.
د دغه هېواد پولیسو ویلي، چې پېښه نن یکشنبه سهار داسې مهال وشوه چې یو شمېر کسان د «کاتولیک عشا» په مراسمو کې د ګډون لپاره د میندانایو ایالتي پوهنتون په ورزشی سالون کې راټول شوي وو.
له پېښې خپاره شوي تصویرنه د «لانایو دل سور» والي مامینټال ادیونګ جونیور ښيي چې روغتون کې یې د پېښې له ناروغانو او د چاودنې له ځایه لیدنه کړې ده.
مامینټال ویلي: «زه د نن سهار له تاوتریخوالي ډکه پېښه غندم. پر ښوونیزو ځایونو ترهګریز بریدونه باید ودرول، او همدارنګه وغندل شي؛ ځکه دا مرکزونه د سولې کلتور دود ګرځوي.»
د دغه هېواد ایالتي پولیسو ویلي، چې پېښه ښايي د «اسلامي دولت» د پلویانو ملېشه ځواکونو له خوا د غچ اخیستنې برید وي.
دا چاودنه داسې ښار کې شوې چې په ۲۰۱۷ کال کې د پنځو میاشتو لپاره د «اسلامپالو» ملېشه ځواکونو له خوا کلابنده شوې وه.
د فلیپين پوځ د شنبې په ورځ وویل، چې د جمعې په ورځ یې ۱۱ ملېشه ځواکونه له دې ډلې د «فلیپين اسلامي دولت» غړي چې د اسلامي دولت یوه غوښتونکې ډله ده، په یوه لړ پوځي عملیاتو کې د دل سور په ماګویندانایو ولایت کې وژلي دي.
دا په داسې حال کې ده، چې میندانایو پوهنتون تر بلې خبرتیا تړل شوی دی.
