د فرانسې ولسمشر امانوئل مکرون ویلي چې پاریس له نایجر سره خپله پوځي همکاري پای ته رسوي او خپل ۱۵۰۰ سرتېري به د روان کال تر پایه له دې هېواده وباسي.
د فرانسې دا اقدام به د فرانسې په ساحل او نفوذ کې د پاریس د ترهګرۍ ضد عملیاتو ته لوی ګوذار ورکړي.
مکرون ټینګار کړی چې نه غواړي «د کودتا کوونکو په یرغمل» کې پاتې شي.
مکرون له یوې فرانسوۍ رسنۍ سره په مرکه کې ویلي: «فرانسې پرېکړه کړې چې خپل سفیر راوغواړي او له نایجر سره پوځي همکاري پای ته ورسوي.»
نوموړي زیاته کړه: «په راتلونکو ساعتونو کې به زموږ سفیر او څو دیپلوماتان فرانسې ته راستانه شي او موږ د نایجر له برحاله چارواکو سره خپله پوځي همکاري پای ته رسوو، ځکه دوی نور نه غواړي له ترهګرۍ سره وجنګېږي.»
مکرون ویلي چې پاریس اوس هم د نایجر ګوښه شوی ولسمشر محمد بازوم چې په اوسني وخت کې په کورني بند کې دی د دغه هېواد د قانوني مشر په توګه پېژني.
