طالبانو د یوې اعلامیې په خپرولو سره ویلي چې نن دوشنبې له غرمې مخکې یوولسو بجو په شاوخوا کې د خوست ښار یوه جومات ته څېرمه هوټل کې چاودنه وشوه.
د طالبانو په وینا په دې هوټل کې «وزیرستاني کډوال» اوسېدل چې په دې پېښه ورته زیان رسېدلی دی.
د طالبانو په اعلامیه کې راغلي چې په دغه چاودنه کې درې تنه وژل شوي او اوه نور ټپیان دي.
طالبانو ویلي چې ددې چاودنې په اړه د دوی څېړنې روانې دي.
له بلې خوا، یو شمېر پاکستاني رسنیو د پاکستاني جنګیالیو د قوماندان په ګډون ځینو سرچینو له قوله رپوټ ورکړی چې په خوست ښار کې د نن ورځې چاودنه پر هغه هوټل د بې پیلوټه الوتکې د برید له امله بلل شوې چې پاکستاني جنګیالي پکې مېشت وو.
پاکستاني رسنیو رپوټ ورکړی چې دا جنګیالي د حافظ ګل بهادر د ډلې اړوند وو او د دې برید موخه هم همدا کس و.
دغو رسنیو رپوټ ورکړی چې په دې چاودنه کې شل تنه ټپیان شوي دي.
ددغو رسنیو د مالوماتو له مخې، ګل بهادر د پاکستاني طالبانو تحریک د یوې څانګې قوماندان دی.
طالبانو تراوسه د پاکستاني رسنیو د ادعا په اړه څه نه دي ویلي.
