د قطر لومړي وزیر محمد بن عبدالرحمن آل ثاني د جمعې په ورځ په کندهار کې د طالبانو له رییس الوزرا ملامحمد حسن آخوند سره وکتل او د دوه اړخیزو اړیکو د پياوړتیا په اړه یې خبرې اترې وکړې.
د طالبانو ویاند ذبیح الله مجاهد په دې اړه په یوه ټویټ کې ویلي چې د قطر لومړي وزیر په دې کتنه کې د دواړو هېوادونو ترمنځ د اړیکو د پياوړتیا او باور کچې د لوړولو په اړه خبرې اترې وکړې.
مجاهد زیاته کړې چې دواړو لوریو همداراز د پوهنې، روغتیا او اقتصادي برخو کې د عملي همکاریو په هکله خبرې اترې وکړې.
ویل کېږي چې د قطر لومړي وزیر همدارنګه د هېواد له پخواني ولسمشر حامدکرزي او د سولې د عالي شورا له رییس عبدالله عبدالله سره هم کتلي دي.
نوموړي په افغانستان کې ټول لوري ملي پخلاینې ته هڅولي دي.
دا له افغانستانه د امریکايي ځواکونو له وتلو وروسته د یوه عربي هېواد د تر ټولو لوړپوړي چارواکي لومړنی سفر دی.
قطر له هغو هېوادونو څخه دی چې پر طالبانو تر ټولو زیات نفوذ لري.
دغه هېواد په افغانستان کې مخکیني نظام له سقوط وروسته د بهرنیانو د وتلو په بهیر کې مرسته کړې ده.
قطر همداراز، د امریکا او طالبانو ترمنځ د سولې مذاکراتو کوربه و چې اتلس میاشتې یې دوام وکړ.
