د افغانستان بانک چې اوس د طالبانو تر واک لاندې دی وایي، د افغانستان د کنګل شویو شتمنیو د ترلاسه کولو لپاره خبرېاترې روانې دي.
د دغه بانک مسوولینو کابل کې د طالبانو د رسنیو په مرکز کې د یوې خبري ناستې پر مهال ډاډ ورکړی چې د هېواد د اسعاري زېرمو یوې برخې ته یې لاسرسی پیدا کړی دی.
د افغانستان بانک تر ۹ میلیارد ډالرو زیاته شتمني د امریکا او اروپا په بانکونو کې کنګل شوې او واشنګټن د دغو پیسو د ساتلو لپاره په سویس کې د افغانستان اماني صندق جوړ کړی دی.
تر اوسه د افغانستان د شتمنیو درې نیم میلیارد ډالر دغه صندق ته لېږدول شوي دي.
ــــــــــــــــــــــــ
د ایران د بوشهر ولایت د کار او ټولنیزې رفاه عمومي مدیر وایي چې ایران کې د مېشتو افغانانو د دندو وضعیت د تګلارې د ټاکلو بهیر د بوشهر په ګډون د دغه هېواد په پنځلسو ولایتونو کې پيل شوی دی.
د ایران د بوشهر ولایت د کار او ټولنیزې رفاه عمومي مدیر وایي، چې په دې طرحه کې د نوملیکنې شرط د وګړو قانوني اقامت دی.
ایرانيو رسنیو لیکلي چې له ۱۸ تر ۶۰ کلنو افغانان به له دې طرحې ګټه پورته کړي.
ــــــــــــــــــــ
د طالبانو د بهرنیو چارو وزارت سرپرست د روسیې له سفیر سره په لیدنه کې د سیاسي او اقتصادي همکاریو په اړه خبرېاترې کړې دي.
امیرخان متقي ویلي، چې افغانستان له روسیې سره د سیاسي او اقتصادي اړیکو پراختیا ته لېوالتیا لري.
د روسیې سفیر دیمیتري ژیرنوف هم د دواړو هېوادونو ترمنځ د اړیکو پر نږدېوالي ټینګار کړی او په راتلونکي کې یې په بېلابېلو برخو کې د دولتي پلاوو تګراتګ ته چمتووالی ښودلی دی.
