رویټرز د دوو خبرو سرچینو له قوله لیکلي، چې ټاکل شوې سعودي عربستان او سوریه له یوې لسیزې وروسته خپل سفارتونه بېرته پرانیزي.
د سوریې حکومت ته یوه بله نږدې سرچینه وایي، چې د دمشق او ریاض ترمنځ اړیکې د عربستان او ایران له تاریخي هوکړې وروسته چې د بشارالاسد د حکومت نږدې ملاتړی ګڼل کېږي، زیاتېږي.
د ریاض او دمشق ترمنځ د اړیکو بیا ټینګښت د سوریې حکومت او عربي هېوادونو د اړیکو د بیارغولو په برخه کې ترټولو مهم خوځښت دی. ډېری عربي او غربي هېوادونو د سوریې د کورنۍ جګړې له پيل وروسته د بشارالاسد له حکومت سره اړیکې پرې کړې.
د دغې سرچینې له قوله دواړه هېوادونه غواړي چې خپل سفارتونه «له کوچني اختر وروسته» د اپرېل میاشتې په منځ کې پرانیزي.
په فارس سمندرګي کې د یوه دیپلومات او سیمهییزې سرچینې په وینا، دغه پرېکړه د سوریې له یوه لوړپوړي استخباراتي چارواکي سره د سعودي عربستان د خبرواترو په پایله کې شوې ده.
د سعودي عربستان دولتي ټلویزیون هم د سعودي عربستان د بهرنیو چارو وزارت د یوه چارواکي له قوله تایید کړې، چې د کونسلي خدماتو د بیا پيل لپاره د سوریې د بهرنیو چارو له وزارت سره خبرېاترې روانې دي.
دغو سرچینو د موضوع د حساسیت له امله د نهپېژندل کېدو په شرط دا خبرې کړې دي.
امریکا او د سیمې څو متحدین له دې جملې سعودي عربستان او قطر د سوریې حکومت ضد د ځینو یرغلګرو پر مشرۍ تورن دي.
بشارالاسد د ایران او روسیې په مرسته وتوانېد د سوریې په ډېری سیمو کې مخالفینو ته ماته ورکړي.
