متحده ایالاتو هغه پلان شوې ناسته لغوه کړې چې ټاکل شوې وه د امریکا د ولسمشر ډونالډ ټرمپ او د روسیې د ولسمشر ولادیمیر پوتین ترمنځ د هنګري پلازمېنه بوداپست کې ترسره شي.
د فایننشل ټایمز ورځپاڼې د جمعې د ورځې د راپور له مخې، واشنګټن دا پرېکړه وروسته له هغه وکړه چې مسکو د اوکراین په اړه پر خپلو «سختدریځو او نهمنونکو غوښتنو» ټینګار وکړ.
ورځپاڼې د خپلو سرچینو په وینا لیکلي چې د ناستې لغوه کېدل د یوې «ترینګلې تلیفوني خبرې» وروسته رامنځته شول، چې د روسیې د بهرنیو چارو وزیر سرګي لاوروف او د امریکا د بهرنیو چارو وزیر مارکو روبیو ترمنځ ترسره شوې وه.
فایننشل ټایمز زیاتوي، روبیو له دغې اړیکې وروسته ټرمپ ته راپور ورکړ چې «مسکو د اوکراین په اړه د خبرو یا مصالحې هېڅ لېوالتیا نه لري.»
د راپور له مخې، د روسیې د بهرنیو چارو وزارت څو ورځې مخکې له دې چې د ناستې د لغوه کېدو اعلان وشي، واشنګټن ته یو رسمي یادښت لېږلی و او یو ځل بیا یې پر خپلو غوښتنو ټینګار کړی و، چې له جملې یې د اوکراین د خاورې د نورو برخو سپارل، د دې هېواد د پوځي ځواکونو د پام وړ کمول، او دا تضمین چې اوکراین به د ناټو غړیتوب نه اخلي، د اوربند لپاره د مسکو شرطونو په توګه یاد کړي وو.
فایننشل ټایمز لیکلي چې متحده ایالاتو دا شرطونه «نهمنونکي» بللي او دغه دلیل ناستې ته د لغوه کېدو لامل شوی دی.
سپینې ماڼۍ او د روسیې د بهرنیو چارو وزارت تر اوسه د دغه راپور په اړه رسمي غبرګون نهدی ښودلی.
تر دې وړاندې، ټرمپ د اوکراین له غوښتنې ملاتړ کړی و، چې د «اوسنیو جبهوي کرښو پر بنسټ بېړنی اوربند» رامنځته شي، خو د روسیې حکومت ویلي چې یوازې هغه وخت به جګړه ودرېږي، کله چې د «امنیتي تضمینونو او ځمکنۍ امتیازاتو» په اړه یې غوښتنې ومنل شي.
