د طالبانو د عدلیې وزارت اعلان کړی چې د قوانینو د مسودې کار به ډېر ژر بشپړ شي. د طالبانو د عدلیې وزیر د ناروې له شارژدافیر سره په لیدنه کې ویلي چې د فرعي قوانینو مسوده ۹۵ سلنه بشپړه شوې ده او دا قوانین به ډېر ژر د هبت الله اخندزاده له لاسلیک وروسته پلي شي.
د طالبانو د عدلیې وزارت همداراز زیاته کړې چې ټول فرعي قوانین به له قرآن، سنت او حنفي فقهې څخه اخیستل شوي وي، او دیني عالمان هم له حقوقي عالمانو سره یوځای د دې قوانینو په مسوده کار کوي.
