د امریکا د بهرنیو چارو وزارت مرستیال ویاند د پنجشنبې په ورځ په یوه خبري غونډه کې وویل چې د افغان وګړو لپاره د امریکا کډوالۍ د ځانګړې ویزې بهیر لاهم روان دی. هغه وويل چې امريکا د افغانستان په مسئله کې د خپلو ګټو په پام کې نيولو سره عمل کوي.
ټامي پیګوټ په افغانستان کې د زده کړو څخه محرومو نجونو په تړاو د ټرمپ ادارې د ژمنې په اړه د یوې پوښتنې په ځواب کې ټینګار وکړ چې واشنګټن لا دمخه د نورو چینلونو له لارې دا مسئله بحث کړې ده.
د ټرمپ ادارې تر اوسه د افغانستان لپاره روښانه پالیسي نه ده اعلان کړې او په ځانګړې توګه یې د طالبانو په واکمنۍ کې د بشري حقونو د وضعیت په اړه دریځ نه دی نیولی.
هغه وويل: «موږ مخکې په دې اړه د نورو چینلونو له لارې خبرې کړې دي. زه بیا هم ویلای شم چې کله زموږ د ملي ګټو خبره راځي موږ د امریکا ګټو ته دوام ورکوو خو زه په دې پوښتنه کې د اضافه کولو لپاره نور څه نلرم.»
د امریکا د بهرنیو چارو وزارت څخه د SIV یا د کډوالۍ د ځانګړې ویزې د کډوالو د قضیو په اړه هم پوښتنه وشوه. د امریکا د هغو متحدینو د برخلیک په اړه چې په پاکستان، البانیا یا نورو هیوادونو کې انتظار باسي.
هغه وويل: « د کډوالۍ د ځانګړې ویزې په صورت کې د اس آی مرکې هم روانې دي. دا بهیر دوام لري.»
د امریکا د ولسمشر ډونالډ ټرمپ څرګندونې د افغانستان لپاره د هغه د لید پر ځای، له افغانستان څخه د امریکا د ځواکونو د وتلو بهیر پر نیوکو ډېرې متمرکزې دي. هغه د بګرام هوايي اډې څخه د امریکا د وتلو او پاتې امریکايي تجهیزاتو څخه ناخوښ دی خو د ځینو سرچینو په وینا، هغه تر اوسه د طالبانو تر کنټرول لاندې د افغانستان لپاره کومه پالیسي نه ده طرحه کړې.
په افغانستان کې د بشري حقونو د وضعیت په اړه د نړیوالې ټولنې د اندیښنو سره سره، د امریکا د کورني امنیت وزارت د دوشنبې په ورځ اعلان وکړ چې د هغو افغان وګړو لپاره د لنډمهاله ساتنې پروګرام چې د پخواني حکومت له ړنګېدو وروسته یې په امریکا کې پناه اخیستې وه، د جولای په ۱۲مه پای ته رسیږي. وزارت د دې پریکړې دلایل په افغانستان کې «د امنیتي شرایطو ښه والی» او د امریکا ملي ګټې په ګوته کړي.
