واشنګټن پوسټ د سپینې ماڼۍ د سرحدي چارو د مشر ټام هومان په حواله راپور ورکړی چې د ټرمپ حکومت هڅه کوي چې د امریکا د کډوالۍ افسرانو ته اجازه ورکړي چې د هغو کوچنیو کډوالو په اړه معلومات ولري چې د خپلو والدینو پرته متحده ایالاتو ته داخل شوي دي.
د راپور پر بنسټ، ښاغلي هومان ويلي چې که څه هم معلومات په عمده توګه د ماشومانو د خوندیتوب ډاډ ترلاسه کولو لپاره کارول کیږي، هغه په راتلونکي کې د پلي کولو موخو لپاره د معلوماتو کارولو څخه انکار نه کوي.
هغه له دغه امریکايي ورځپاڼې سره په مرکه کې وویل: «دا د ماشومانو په اړه د موندلو په هکله دي. معلومات د قانون پلي کولو لپاره نه کارول کیږي.»
دا په داسې حال کې ده چې د ډونلډ ټرمپ د ولسمشرۍ په لومړي دوره کې، د امریکا د کډوالو د استوګنې دفتر د کم عمره کډوالو او د دوی د احتمالي سرپرستانو د هویتي معلوماتو شریکول له کډوالو او ګمرکونو ادارې سره پیل کړل، څو د نېولو او شړلو لپاره ترې استفاده وکړي، خو وروسته کانګرېس دا سیاست ودراوه.
د امریکا د روغتیا او بشري خدمتونو وزارت اړوند «او آر آر» اداره د هغو ماشومانو مسؤلیت لري چې له خپلو والدینو پرته امریکا ته داخلېږي. د دې ادارې په وینا، دوی د ماشومانو احتمالي سرپرستان پېژني او ارزوي، او زیاتوي چې اکثره سرپرستان د ماشومانو والدین یا د هغوی نږدې کورنۍ دي چې په امریکا کې ژوند کوي.
