له پاکستان او ایران څخه په یوه ورځ کې څه باندې درې زره افغان کډوال ایستل شوي دي.
د طالبانو تر کنټرول لاندې د کډوالو چارو وزارت په یوه خبرپاڼه کې ویلي چې د سه پرون(سه شنبه د چنګاښ١٢) له پاکستان او ایران څخه ۳زره ۲۵۵ افغان کډوال په «خپله خوښه او جبري توګه» ايستل شوي دي.
د راپور له مخې، پاکستان ۹۰۸ او ایران ۲زره۳۴۷ کسان ایستلي دي.
د طالبانو تر واک لاندې دغه وزارت وايي، کډوال د ننګرهار، کندهار او نیمروز ولایتونو له لارو افغانستان ته داخل شوي دي.
د دغه وزارت د معلوماتو له مخې، ۴۲۸ تنه د تورخم او ۴۸۰ نور د سپین بولدک له لارې هېواد ته داخل شوي دي.
په همدې حال کې او د ياد راپور له مخې د نیمروز ولایت د ورېښمو د پل له لارې ۲زره۳۴۷ نور کډوال افغانستان ته داخل شوي دي.
دا په داسې حال کې ده، چې پاکستان په روانه اونۍ کې د ٨٠٠زرو نورو افغان کډوالو د ایستلو بهیر هم پیل کړی دی.
