د ایران قضایي چارواکو اعلان کړی چې په دغه هېواد کې ۱۶۴ تنه افغان بندیان له ایراني زندانونو څخه د افغانستان د ننه زندانونو ته انتقال او طالب چارواکو ته سپارل شوي دي.
د ایران د فارس اژانس د راپور له مخې، د هیرمند ولسوالۍ څارنوال علیرضا سرحدي ویلي چې دا بندیان د سې شنبې په ورځ په(میلک بندر) کې د ایران او طالبانو ترمنځ د محکومینو د لېږد د هوکړې د یوولسم پړاو په چوکاټ کې تسلیم کړل شول.
د سرحدي په وینا، یادو بندیانو تر دې وړاندې د ایران په شپږو ولایتونو، سیستان او بلوچستان، هرمزګان، فارس، کرمان، بوشهر او خوزستان کې د بند ټاکلې موده تېروله.
د هیرمند څارنوال زیاته کړې چې دا لړۍ د دواړو لورو د قضایي، امنیتي او اجرایوي بنسټونو په همغږۍ ترسره شوې، ترڅو بندیان د خپل محکومیت پاتې موده په خپل هېواد کې تېره کړي.
ایراني چارواکو د دغو بندیانو د جرمونو د نوعیت په اړه څه نه دي ویلي، خو تر دې وړاندې د داسې بندیانو ډېره برخه د نشهیي توکو او په غیرقانوني توګه د سرحدونو د اوښتو په تور نیول شوي وو.
ایران د هغو هېوادونو له ډلې دی چې تر ټولو زیات افغان کډوال په کې مېشت دي او د رسمي شمیرو له مخې، دا مهال زرګونه افغان وګړي د مختلفو جرمونو له امله د ایران په بېلابېلو زندانونو کې بندیان دي.
په تېرو څو کلونو کې له ایران څخه د بندیانو د لېږد موضوع د دواړو لورو ترمنځ د بحثونو یو اصلي محور و او طالبانو واک ته له بېرته رسېدو وروسته په وار وار له تهران څخه د دې لړۍ د ګړندي کولو غوښتنه کړې ده.
سره له دې، د بشري حقونو یو شمېر بنسټونو اندېښنه ښودلې چې طالبانو ته د بندیانو په سپارلو سره، د هغوی د دوسیو د روښانتیا او عادلانه محاکمې په برخه کې پوره تضمین شتون نه لري.
