د امریکا ولسمشر ډونالډ ټرمپ ویلي چې ایران له واشنګټن څخه د اقتصادي بندیزونو د لېرې کولو غوښتنه کړې ده.
ټرمپ د پنجشنبې په ماښام د سپینې ماڼۍ په یو خبري ناسته کې وویل: «ایران پوښتنه کړې چې ایا بندیزونه لرې کېدای شي. پر ایران ډېر سخت امریکايي بندیزونه لګېدلي دي چې د دوی د اقتصادي او سیاسي فعالیتونو مخه یې نیولې ده. زه د دې موضوع د اورېدو پرانیستی یم، او وګورو چې څه پېښېږي.»
د ایران د ملګرو ملتونو استازولۍ تر اوسه د ټرمپ د څرګندونو په اړه تبصره نه ده کړې.
د ایران ستر مذهبي مشر، آیتالله علي خامنهای، څو ورځې وړاندې ویلي و چې تر هغو به له امریکا سره همکاري ممکنه نه وي، څو چې واشنګټن د اسراییلو ملاتړ ته دوام ورکوي او په منځني ختیځ کې پوځي مداخلې نه بندوي.
ټرمپ، چې د جنورۍ په میاشت کې د دویم ځل لپاره ولسمشر شو، د خپلې «اعظمي فشار» تګلارې ته بېرته دوام ورکړی، چې هدف یې د ایران د اټومي وسلو د جوړولو مخنیوی بلل کېږي. د راپورونو له مخې، امریکا د جون په میاشت کې د ایران پر اټومي تاسیساتو بمبار کړی و.
له دې مخکې، تهران او واشنګټن د اټومي خبرو پنځه پړاوونه ترسره کړي وو، خو د ایران او اسراییلو ترمنځ د ۱۲ ورځنۍ جګړې وروسته دغه خبرې وځنډېدې. د یورانیم د غني کولو مسئله لا هم د دواړو لورو ترمنځ د اختلاف اصلي ټکی بلل کېږي، لوېدیځ هېوادونه غواړي د ایران غنيکول صفر ته راکم شي، خو تهران دا غوښتنه رد کړې ده.
