ملګرو ملتونو پر غزې ښار د اسراییلي پوځ وروستی خونړی یرغل په کلکه غندلی او ویلی یې دي چې دې چارې د ملکي وګړو پر ژوند، روغتیا او خوارځواکۍ خورا ناوړه اغېز کړی دی.
د ملګرو ملتونو ویاند، استفان دوجاریک، په نیویارک کې خبریالانو ته وویل:
“ملګري ملتونه د اسرایيلو د پوځ دا خونړۍ پراخېدونکې حملې غندي. دا یرغل، چې د تېرې اونۍ په پای کې شوی، د لسګونو کسانو د وژلو او ټپي کولو راپورونه لري. موږ یو ځل بیا له ټولو خواوو غوښتنه کوو چې د ملکي وګړو او بشري کارکوونکو ساتنه دې وشي او نړیوالو قوانینو ته دې درناوی وشي.”
د فلسطیني کډوالو لپاره د ملګرو ملتونو ادارې مشر د یکشنبې په ورځ پر “ایکس” لیکلي، چې یوازې په تېرو څلورو ورځو کې په غزه کې د دې ادارې لس ودانۍ په نښه شوي، چې پکې اووه ښوونځي او دوه کلینیکونه شامل دي. دغه ودانۍ د بېځایه شویو لپاره د سرپناه په توګه کارول کېدې.
د ملګرو ملتونو د راپور له مخې، په وروستیو ورځو کې شاوخوا ۷۰ زره خلک د غزې له شمال څخه جنوب ته تللي دي. د تېرې میاشتې له پیل راهیسې ټولې بېځایه شوې کورنۍ ۱۵۰ ځلې له شماله جنوب ته کډه کړې ده.
یوه اندېښمنوونکې موضوع دا ده چې د غزې ښار شاوخوا یو پر درېیمه برخه د خوارځواکۍ درملنې مرکزونه بند شوي، ځکه د جبري کډوالۍ له امله یا فعالیت نهشي کولای، یا ودانۍ یې له منځه تللې دي.
د غزې د روغتیا وزارت ویلي، د دغه یرغل په پایله کې تر اوسه ۴۲۵ کسان د لوږې او خوارځواکۍ له امله مړه شوي، چې شاوخوا درېیمه برخه یې ماشومان دي.
د ملګرو ملتونو همکارانو ویلي چې که څه هم دوی هره ورځ له ۴۰ زره زیات خوراکونه وېشي، خو دا لا هم د اړتیاوو پر وړاندې بسنه نه کوي. تر شنبې پورې، ۲۰ ادارو په ۱۱۶ پخلنځیو کې ۵۵۸ زره خوراکونه چمتو او وېشلي دي.
خو دوجاریک خبرداری ورکړی، چې روغتیايي خدمتونه لا هم له سختو محدودیتونو سره مخ دي. “کلینیکونه تړل شوي، امبولانسونه محدود دي، او زرګونه ناروغان د خدماتو په تمه دي.”
د راپورونو له مخې، ۷۷ سلنه سړکونه په غزه کې زیانمن شوي دي، او د بشري مرستو همغږې ادارې (اوچا) وایي چې مرستې لا هم د اسراییلي مقاماتو له خنډونو سره مخ دي.
د یکشنبې په ورځ، له ۱۷ انساني ماموریتونو څخه یوازې څلور ترسره شوي، او پاتې یا رد شوي، یا یې اجازه نه ده ورکړل شوې. پکې یوه مرستندویه پروژه د شمال لپاره د اوبو ټانکرونه انتقالول، خو بند شوې ده.
دوجاریک وویل:
“زموږ بشري همکاران بیا هم ټینګار کوي چې مرستو ته باید بېخنډه لاسرسی تضمین شي. بشري مرستې باید د غزې له مختلفو لارو، په ځانګړې توګه شمالي سیمو ته، په پراخه کچه ننوځي.”
