د ملګرو ملتونو سرمنشي، انټونیو ګوټرېش، د هېواد په ختیځ کې د تېرې شپې د مرګونې زلزلې د قربانیانو له کورنیو سره؛ خواخوږي څرګند کړې ده.
هغه پر اکس لیکلي: «زه خپلې ژورې خواخوږۍ د قربانیانو له کورنیو سره شریکوم، او ټپیانو ته د ژر تر ژره روغتیا هیله لرم.»
ګوټرېش ټینګار کړی، چې د ملګرو ملتونو د مرستو رسونې ډلې په افغانستان کې بسیج شوي او له اړمنو خلکو سره د مرستې لپاره به هېڅ ډول هڅې ونه سپموي.
د طالبانو تر ادارې لاندې د کونړ ولایت د طبیعي پېښو سره د مبارزې ادارې مسؤولین وایي، د وروستیو شمېرو له مخې، د تېرې شپې زلزلې له امله د مړو شمېر ۵۰۰ تنو ته رسېدلي دي.
د هغوی په وینا، نږدې ۱۰۰۰ کسان ټپیان شوي دي.
د طالبان په وینا، دغه تلفات په نورګل، سوکي، وتپور، مانوګي او چپه دره ولسوالیو کې راپور شوي دي.
همدارنګه په ننگرهار کې د طالبانو د والي د رسنیو دفتر ویلي دي چې په دې زلزلې کې ۹ کسانو ژوند له لاسه ورکړی او ۲۰ نور ټپيان شوي دي. په ورته وخت کې راپورونه ښيي چې په لغمان ولایت کې هم د دې زلزلې په ترڅ کې ګڼ کسان ټپيان شوي دي.
