کابل کې د طالبانو د امنیه قوماندانۍ ویاند، خالد ځدراڼ وايي، د غلو یو لوی باڼد، چې په بېلابېلو ولایتونو کې یې تر ۱۰۰ ډېر موټرونه غلا کړي، نیول شوی دی.
ښاغلي ځدراڼ، د دوشنبې په ورځ پر ایکس لیکلي، چې دغه بانډ د طالبانو تر واک لاندې کابل امنیې قوماندانۍ د ۱۵مې حوزې پولیسو له لوري نیول شوي دی.
د هغه په وینا، په دغه بانډ کې نه یوازې د موټرو اصلي غله، بلکې هغه همکاران هم شامل دي چې غلا شوو موټرونو ته یې جعلي شاسي نمبرونه او رنګونه بدلول.
خالد ځدراڼ زیاته کړې: «د نیول شوو کسانو سره شاوخوا ۳۰ موټرونه، د موټرو اسناد، شاسي نمبرونه او ځینې نور توکي هم نیول شوي دي.»
دا په داسې حال کې ده چې طالبانو تل په ټول هېواد کې د بشپړ امنیت د تأمین ادعا کړې ده.
