طالبانو په فاریاب او کندوز ولایتونو کې دوه ښځې او درې نارینه د «اخلاقي فساد، له کوره د تېښتې او د تښتولو» په تور په دُرو وهلي دي.
د طالبانو تر واک لاندې سترې محکمې په دوو جلا خبرپاڼو کې ويلي چې دوی هر یو کس په ۳۹ دورو او له يوه تر دوو کالونو بند محکوم کړی دی.
د طالبانو په خبرپاڼه کې راغلي، چې دا کسان د طالبانو تر واک لاندې سترې محکمې له تایید وروسته په دُرو وهل شوي دي.
د دې خبرپاڼې له مخې، په فاریاب ولایت کې د درېیو کسانو د بدني سزا ورکولو پرمهال، د طالبانو سیمه ییز قضايي چارواکي، د هغوی د سیمه ییزو ادارو چارواکي، د طالبانو تر مدیریت لاندې د ملکي او نظامي څانګو کارمندان او همدارنګه ځایي اوسیدونکي حضور درلود.
په تېره يوه میاشت کې په درو وهل شويو کسانو شمېر
د تېرې میاشتې له پیل راهیسې، طالبانو په بېلابېلو ولایتونو کې د ياد پنځو کسانو په ګډون ۳۸ تنه په عام محضر کې په دُرو وهلي دي، چې ۹ یې ښځې دي.
د طالبانو دا چلند د ملګرو ملتونو په ګډون د بشري حقونو د نړیوالو سازمانونو له جدي او سختو غبرګونونو سره مخ شوی دی. دغو نړیوالو سازمانونو په کراتو له طالبانو غوښتنه کړې چې په عام محضر کې د اشخاصو مجازات کول سمدستي ودروي.
