د ایران د پارلمان د ملي امنیت او بهرنۍ پالیسۍ د کمیسیون غړې فدا حسین مالکي وايي، چې ایران ته د هلمند د اوبو د حق د ورکولو په اړه د طالبانو ادعاوې حقیقت نه لري.
د هغه په وينا، طالبانو سېلاب د اوبو د حق د ورکولو په معنا ګڼلى دى.
دغه ایرانی چارواکی وایی چې د طالبانو لخوا ایران ته د هلمند د اوبو د حق د ورکړې په برخه کې کوم اقدام نه دی شوی.
د ایراني رسنیو د راپور له مخې فدا حسین مالکي ویلي: «دا حقیقت چې دا سېلاب وو، نه د اوبو حق، دا هغه موضوع ده، چې هغه څوک چې د طالبانو له دریځه دفاع کوي، هم نه مني.»
هغه زیاته کړې،« هغه اوبه چې ایران ته راغلي د اوبو حق نه دی، سېلاب دی، دا مسٸله چې د انرژۍ د هغه وخت وزیر هم منلې وه، خو ځینو بیا ادعا کوله چې دا د اوبو حق دی. دغه ایراني چارواکي د ایران په سیستان او بلوچستان کې د اوبو د کمښت پر ستونزو اندېښنه څرګنده کړه.
فدا حسین مالکي ټینګار وکړ: تمه ده چې د ایران د بهرنیو چارو د وزیر ښاغلي عراقچي په هڅو او له نړیوالو قوانینو سره سم په کره پلان جوړونې سره، ایران ته د هلمند د اوبو د حق د ورکولو موضوع تعقیب شي چې د خلکو قانوني حق دى.»
ایران او افغانستان له اوږدې مودې راهیسې د ګډو اوبو پر سر اختلافات لري. تهران په تېرو وختونو کې کابل تورن کړی چې د هلمند پر سیند د بند په جوړولو سره یې د اوبو جریان محدود کړی دی.
دا سیند کابل ته نږدې د هندوکش له غرونو څخه سرچینه اخلي، د ١١٢٧ کیلومتره (٧٠٠ مايله) په فاصله کې سفر کوي او د سویل لور ته ځي مخکې له دې چې د ایران په سیستان او بلوچستان ولایت کې د هامون تالابونو ته بهیږي.
د اوبو د وېش د تړون له مخې چې په ۱۹۷۳ کال کې لاسلیک شوى، افغانستان مکلف و چې هر کال په اوسط ډول ۸۲۰ میلیونه متره مکعبه اوبه ایران ته ورکړي.
