په پروان ولايت کې ديوې ترافيکي پيښې له امله درې تنه مړه او درې تنه نور ټپيان شول.
د دغه ولايت د امنيه قوماندانۍ لپاره د طالبانو وياند فضل الرحيم مسکين يار وايي، چې دغه پېښه نن(پنجنشبه، زمري۴مه) سهار شاوخوا اوه بجې د سياه ګرد ولسوالۍ په دنداب سيمه کې رامنځته شوې ده.
په پروان کې د طالبانو د امنيه قوماندانۍ وياند وايي، چې دغه پېښه د دوو سراچه ډوله او مازدا موټرو د ټکر له امله رامنځته شوې ده.
نوموړي د پېښې لامل د دغو موټر چلوونکو بې احتیاطي وبلله.
دا په داسې حال کې ده، چې په دې وروستيو کې د هېواد په بېلابېلو لويو لارو ترافيکي پېښې زياتې شوې، چې له امله يې تر اوسه لسګونه کسانو خپل ژوند بايللى دى.
په هېواد کې د طالبانو تر واک لاندې د ترافيکو رياست مسٶلينو له دې وړاندې ويلي وو، چې ډېرى دغه پېښې د موټر چلوونکو د بې احتياطۍ او د موټرونو د تېز سرعت له امله رامنځته کېږي.
