له پاکستان او ایران څخه په یوه ورځ کې تر سلو زیاتې افغان کډوالې کورنۍ ويستل شوې او بېرته هیواد ته راستنې شوې دي.
د طالبانو ترادارې لاندې د باختر خبري اژانس راپور ورکړی چې پرون (جمعه د چنګاښ ٢٢) له پاکستان او ایران څخه ۱۰۴ افغان کډوالې کورنۍ ايستل شوې دي.
په راپور کې راغلي چې دغه کډوال د هرات، نیمروز، کندهار او ننګرهار ولایتونو له لارو افغانستان ته داخل شوي دي.
راپور وايي، ۲۸ کورنۍ د تورخم او ۱۷ نورې کورنۍ د سپین بولدک له لارې هېواد ته داخلې شوې دي.
په همدې حال کې ۴۵ کورنۍ د نیمروز ولایت د ورېښمو پولې او ۱۴ کورنۍ د هرات د اسلام کلا له لارې افغانستان ته داخلې شوې دي.
دا په داسې کې ده، چې د پاکستان لخوا د افغان کډوالو د جبري ایستلو بهیر «ځنډول» د ملګرو ملتونو د کډوالو لپاره د عالي کميسيون له تاييد وروسته؛ د پاکستان د بهرنيو چارو وزارت اعلا وکړ چې چې دا بهير نه دى ځنډېدلى او د تېر په څېر ادامه لري.
د يادونې وړ ده، چې د ملګرو ملتونو په د خبرپاڼې پر بنست، پاکستاني چارواکو تر دې مخکې د ملګرو ملتونو د کډوالو له عالي کميسيون مشر سره په کتنه کې ویلي و، چې د افغان کډوالو جبري ایستلو بهير به ودروي.
