د المپیک نړیوالې کمیټې ویلي چې د ۲۰۲۲ کال له ډسمبر میاشتې راهیسې افغانستان کې له زدهکړو او ورزش څخه د نجونو او ښځو د محدودیت لیري کولو لپاره هېڅ اقدام نه دی شوی.
دغې کمیټې د چهارشنبې پر ورځ یوه خبرپاڼه کې ویلي، هغه راپور چې د افغانستان د المپیک له ملي کمیټې او د ورزش او بدني روزنې له ریاست څخه غوښتی و، ترلاسه کړی یې دی.
په دغه خبرپاڼه کې راغلي، د افغانستان د المپیک ملي کمیټې راپور ښيي چې د افغانستان ورزشي چارواکي له شته چارواکو سره تعامل لرلی، ترڅو ورزش ته د نجونو او ښځو د لاسرسي د تضمین موضوع ته رسېدنه وکړي او هغوی پرېکړې ته په تمه دي.
د المپیک نړیوالې کمیټې ټینګار کړی، هغه پرېکړه چې دې کمیټې د ۲۰۲۲ کال د ډسمبر میاشتې پر ۶ د ښځو د ورزش او زدهکړو د وضعیت تر روښانه کېدو د افغانستان د المپیک له ملي کمیټې څخه د هر ډول ملاتړ له نه ترسره کولو په هکله کړې، لا هم په خپل ځای پاتې کېږي.
په همدې حال کې؛ د المپیک کمیټې اجرایي پلاوي یو ځل بیا له طالبانو غوښتي چې د ښځو او نجونو پروړاندې لګول شوي بندیزونه ژرترژره لیرې او ورزش ته د هغوی لاسرسی تضمین کړي.
خبرپاڼه کې راغلي، چې په شته وضعیت سربېره د المپیک نړیواله کمیټه د هغو لوبغاړو ملاتړ ته چې غواړي د پاریس ۲۰۲۴ المپیک لوبو کې ګډون وکړي، دوام ورکوي.
په خبرپاڼه کې ټینګار شوی، چې اوسمهال لس ورزشکاران د المپیک د یووالي له بورسیې ګټه اخلي او ډېری یې د المپیک د ملي کمیټې په مرستې له هېواده بهر تمرین کوي.
