په متحده ایالاتو کې د «نو کېنګز» یا «پاچایان نه غواړو» تر نوم لاندې پراخ لاریونونه ترسره شوي، چې په کې میلیونونه امریکایانو د ولسمشر ډونالډ ټرمپ پر ضد واټونو ته راوتي دي. د مظاهرو ګډونوالو د ټرمپ له «واکپالنې، اداري فساد او ډیموکراټیکو اصولو د کمزوري کولو» پر ضد غږ پورته کړ.
د شنبې په ورځ په شاوخوا ۲۶۰۰ ښارونو، ښارګوټو او سیمو کې دغه لاریونونه تنظیم شوي وو. د نیویارک، بوسټن، فیلادلفیا، شیکاګو، ډینور، سیلټل، لاسانجلس او واشنګټن ډي سي ښارونو کې لسګونه زره کسان راټول شوي وو.
پولیسو ویلي چې مظاهرې عمومي ډول سولهییزې وې او د تاوتریخوالي یا قانونماتۍ راپور نه دی ورکړل شوی. ګډونوالو د ډیموکراسۍ، بیان ازادۍ او د استبداد پر ضد شعارونه ورکول.
د لاریون تنظیموونکې، لیا ګرینبرګ، چې د «انډیویزیبل» د مدني غورځنګ مشره ده، وویل: «په امریکا کې تر ټولو بنسټیز اصل دا دی چې موږ پاچاهان نه لرو، او د سولهییز اعتراض حق مو خوندي دی.»
په لوېدیځو ایالتونو کې د لاسانجلس او سیاټل ښارونو لاریونونه هم په زرګونو کسانو ترسره شول. د سیاټل پولیسو د اټکل له مخې، یوازې په سنډیاګو کې له ۲۵ زره زیات کسان راټول شوي وو.
په واشنګټن ډي سي کې مظاهرهچیانو د کانګرس پر لور لاریون وکړ او د امریکا بیرغونه، شعارونه او رنګه بېرغونه یې پورته کړي وو. یو ګډونوال، چې د ازادۍ د مجسمې سرپوش یې اغوستی و، وویل: «موږ د ډیموکراسۍ ملاتړ کوو او د زورواکۍ پر ضد درېږو.»
ځینې پخوانيو جمهوريپالان هم په دغو مظاهرو کې ګډون کړی و. یو ۷۰ کلن پوځي تقاعد شوي کوین برایس، وویل: «زه ټول عمر جمهوريپال وم، خو اوس ګوند له خپلو بنسټیزو ارزښتونو څخه اوښتی دی.»
ولسمشر ټرمپ د جمعې په ورځ په یوه تلویزیوني مرکه کې وویل: «هغوی ماته پاچا وايي، خو زه پاچا نه یم.»
د ډیموکرات ګوند مشرانو، لکه د سنا اقلیت مشر چک شومر او د استازو جرګې غړې الکساندریا اوکاسیو-کورتز، د «No Kings» غورځنګ ملاتړ کړی دی، خو د استازو جرګې جمهوريپال مشر مایک جانسن دغه مظاهرې «د امریکا ضد لاریونونه» بللي دي.
شنونکي وایي چې دا لاریونونه ښايي د وروستیو لسیزو له تر ټولو لویو مدني خوځښتونو څخه وي. د امریکایي پوهنتون د ټولنپوهنې استاد ډانا فشر د درې میلیونو کسانو ګډون اټکل کړی دی.
دغه مدني غورځنګ د جون په میاشت کې هم د ټرمپ د زوکړې له ورځې سره هممهاله د میلیونونو خلکو په ګډون لاریونونه کړي وو، خو د اکتوبر مظاهرې تر ټولو پراخې بلل شوي دي.
