امریکایانو د ۲۰۰۱م کال د سېپټمبر ۱۱م ترهګریزو بریدونو د ۲۴مې کلیزې په مناسبت، د قربانیانو د درناوي لپاره مراسم، خیریه فعالیتونه او یادغونډې ترسره کړې. دغه مراسم داسې مهال ترسره شول، چې یوه ورځ وړاندې محافظهپال سیاسي فعال چارلي کرک په یوتاه ایالت کې وژل شوی، او چارواکو د امنیتي تدابیرو د زیاتېدو خبر ورکړی.
په نیویارک، پینټاګون، او د پېنسلوانیا ایالت په شینکسویل سیمه کې د قربانیانو کورنۍ، لوړپوړي چارواکي او سیاستوال د یادې پېښې د قربانیانو په یاد غونډو کې ګډون وکړ.
په نیویارک کې، د پېښې د قربانیانو نومونه د کورنیو غړو له خوا ولوستل شول، او د بریدونو د دقیقو وختونو پر مهال چوپتیا وساتل شوه. د امریکا مرستیال ولسمشر جې ډي وینس او د هغه مېرمن اوشا وینس هم په مراسمو کې ګډون کړی و.
په پینټاګون کې هم، هلته د وژل شوو ۱۸۴ کسانو – نظامیانو او ملکیانو – په یاد مراسم جوړ شوي وو، چې پکې ولسمشر ډونالډ ټرمپ او د هغه مېرمن میلانیا ټرمپ هم ګډون کړی و. ټاکل شوې چې هغوی له مراسمو وروسته د نیویارک یانکیز او ډېټرایټ ټایګرز ترمنځ د بیسبال لوبه وګوري.
په شینکسویل کې، چې د “فلایت ۹۳” الوتکه غورځېدلې وه، د نوملړ لوستل، چوپتیا او د ګلونو اېښودو له لارې یې قربانیانو ته درناوی وشو. د پخوانیو سرتیرو چارو وزیر، داګ کولنز، د دې مراسمو مشري وکړه.
په ۲۰۰۱م کال کې د القاعدې له خوا ترسره شوو بریدونو کې ۲،۹۷۷ کسان وژل شوي وو. دا بریدونه د امریکا له خوا د نړیوالې ترهګرۍ پر ضد جګړې پیل ته لاره هواره کړه، چې د افغانستان او عراق جګړې یې له پایلو څخه وې.
