د بشري حقونو د څار بنسټ وايي طالبان باید په افغانستان کې د ښځو له حقونو سرغړونې پای ته ورسوي.
دغه بنسټ د پارېس د ۲۰۲۴ کال د المپیک د پرانیستې په مناسبت پر اېکس ليکلي، د ۲۰۲۴ کال د پارېس المپیک لوبې په داسې حال کې ترسره کېږي چې په افغانستان کې میلیونونه ښځې او نجونې د زده کړو او سپورټ له حقه بې برخې دي.
د بشري حقونو د څار بنسټ وايي، «طالبان باید دا سرغړونې پای ته ورسوي او د ښځو پر بنسټیزو حقونو محدودیتونه لرې کړي.»
دا په داسې حال کې ده، چې طالبانو د ۲۰۲۱ کال په اګست کې پر افغانستان د واک تر لاسه کولو وروسته، ښځې او نجونې له خپلو ټولو اساسي حقونو بې برخې کړې او د ښځو د ژوند په بېلابېلو اړخونو یې سخت محدودیتونه وضع کړي دي.
طالبانو له واک ترلاسه کولو وروسته له شپږم ټولګي پورته نجونې له زده کړو منعې کړې او د نجونو او ښځو پر مخ يې د پوهنتونونو دروازې هم تړلې دي.
د یادولو وړ ده، چې طالبانو د خپلې نږدې درې کلنې واکمنۍ پر مهال په ټول افغانستان کې نجونې په کانکور ازموينه کې له ګډون منعه کړي او آن د یوې نجلۍ له ګډون پرته يې هم دا ازموينه واخيستله.
