شماری از شهروندان افغانستان در تاجیکستان میگویند که پس از بازداشت یک شهروند کشور به اتهام قتل یک زن در شهر خجند، روند بازداشت و انتقال اجباری مهاجران افغان افزایش یافته و حدود ۲۵۰ خانواده به یک کمپ در دوشنبه منتقل شدهاند و با خطر اخراج روبهرو هستند.
بر اساس معلومات وزارت داخله تاجیکستان، یک مرد ۲۲ ساله از افغانستان به اتهام قتل یک زن ۲۷ ساله تاجیکستانی بازداشت شده است.
به گفته این نهاد، فرد بازداشتشده بهگونه غیرقانونی در ولسوالی جبار رسولاوف زندگی میکرده و این زن را با چاقوی آشپزخانه به قتل رسانده است.
مقامهای تاجیکستان افزودهاند که برای او پرونده جنایی تشکیل شده و در حال حاضر در بازداشت موقت بهسر میبرد.
همزمان، مهاجران افغانستان میگویند که پولیس تاجیکستان دهها خانواده را بهاجبار بازداشت کرده و به کمپهایی در دوشنبه انتقال داده است.
به گفته آنان، این افراد حتی اجازه نیافتهاند وسایل شخصی خود را با خود بردارند.
یک مهاجر گفته است که برخی از این افراد سند قانونی ملل متحد، موسوم به «کارت سرخ»، داشتهاند، اما با این وجود بازداشت شدهاند.
او همچنین ادعا کرده است که پولیس سیمکارتهای آنان را شکسته و آنان را بهاجبار منتقل کرده است.
بسیاری از این خانوادهها به دلیل نگرانیهای امنیتی و ترس از انتقامجویی پس از تحولات افغانستان، به تاجیکستان پناه برده بودند.
مقامهای تاجیکستان تاکنون بهگونه رسمی در مورد جزئیات این اخراجها توضیح ندادهاند.
