د پاکستان پخوانی لومړی وزیر نواز شریف چې دا مهال په بریتانیا کې په جلاوطنۍ کې اوسېږي، د شنبې په ورځ به بېرته پاکستان ته ستون شي.
ښاغلی شریف د اداري فساد په تور په ۱۷ کاله بند محکوم شوی، خو تر اوسه یې دغه سزا نه ده پوره کړې.
د دغه هېواد سترې محکمې هم ویلي دي چې پاکستاني چارواکي یې د نواز شریف له نیولو منع کړي دي.
د پاکستان سترې محکمې د پنجشنبې په ورځ د دغه هېواد حکومت د پاکستان د پخواني صدراعظم نواز شریف د نیولو مخه ونیوله چې ټاکل شوې ده له څلور کلنې جلاوطنۍ وروسته د شنبې په ورځ دغه هېواد ته ستون شي.
۷۳ کلن شریف په ۲۰۱۸ کال کې د فساد په دوو قضیو کې مجرم وپېژندل شو او په ۱۷ کاله بند او ۲۵ میلیونه ډالرو جریمې محکوم شو.
د دغه هېواد پخواني لومړي وزیر او د نواز شریف ورور شهباز شریف ویلي دي چې د ښاغلي شریف پر ضد ټول تورونه جعلي دي او یوه عادلانه محکمه کولای شي د هغه بې ګناه ثابته کړي.
د پاکستان مخکینی لومړی وزیر شهباز شریف وايي: «ټاکل شوې له لومړی وزیر نواز شریف د فرضي کیسې پر بنسټ له دندې واک واخیستل شې. هغه په بې ځایه قضیو کې ښکیل ګڼل شوی او ناوړه چلند ورسره وشو. هره عادلانه محاکمه کولای شي د هغه بې ګناهي ثابته کړي.»
هغه په ۲۰۱۹ کال کې د ناروغۍ له امله له اډیاله ازاد زندانه خوشې شو او د درملنې لپاره لندن ته ولاړ او بېرته اسلام اباد ته ستون نه شو.
د نوموړي مدافع وکیل ویلي دي، تمه ده چې ښاغلی شریف د اکتوبر په ۲۴مه محکمې ته حاضر شي.
په همدې حال کې د پاکستان خلکو او د پاکستان “مسلم لیګ ګوند” دغه هېواد ته د نواز شریف د راتګ د پرېکړې هرکلی کړی او د هغه د راتګ لپاره یې تیاری نیولی دی.
د مسلم لیګ ګوند مرستیال میا جاوید لطیف وايي: «موږ به ان شاءالله هغه ورځ هم یاد ته وسپارو او ژمنه به وکړو چې پاکستان به د ۲۰۱۳ کال دور ته وګرځوو.»
ښاغلی شریف په تېره یوه لسیزه کې درې ځله د پاکستان د صدراعظم په توګه وټاکل شو، خو ونه توانېد چې دغه دورې په بشپړ ډول پای ته ورسوي.
د ښاغلي شریف د صدراعظمۍ لومړۍ دوره له ۱۹۹۰ تر ۱۹۹۳، دویمه دوره له ۱۹۹۷ څخه تر ۱۹۹۹ پورې وه کله چې د پخواني ولسمشر پروېز مشرف په مشرۍ د پوځي کودتا له لارې د هغه حکومت نسکور شو او دریمه دوره یې له ۲۰۱۳ تر ۲۰۱۷ پورې وه.
دا په داسې حال کې ده چې د پاکستان په تاریخ کې هیڅ لومړی وزیر نه دی توانیدلی چې خپله پنځه کلنه دوره بشپړه کړي.
عمران خان تېر کال د دغه هېواد د پارلمان له خوا د لومړي وزیر له څوکۍ لرې شو. نوموړی په لومړیو کې د فساد په قضیه کې ونیول شو او تر اوسه هم په زندان کې دی.
