د امریکا په مینیاپولیس ښار کې د تېرې شنبې په ورځ، د ۲۰۲۶ کال د جنوري په ۲۴مه نېټه، د کډوالۍ د فدرالي مامورینو (آی سي اي) لخوا د الکس پریټي په نوم د یو ۳۷ کلن امریکایي تبعه وژنې په دغه هېواد کې د جنجالونو او لاریونونو لویه څپه راپورته کړې ده
که څه هم د ډونالډ ټرمپ ادارې او د سرحداتو د ساتنې جګپوړو چارواکو ادعا کړې چې پریټي پر مامورینو برید کړی و او دوی په دفاعي حالت کې ډزې کړي، خو د عیني شاهدانو لخوا خپرې شوې ویډیوګانې دا خبره په کلکه ردوي.
په دغو ویډیوګانو کې په واضح ډول لیدل کېږي چې الکس پریټي په لاس کې یوازې یو ګرځنده ټلیفون درلود او هڅه یې کوله چې د فدرالي مامورینو لخوا د لاریونوالو د ځپلو صحنه ثبت کړي، خو مامورینو هغه لومړی په زور پر ځمکه را ویشتی او بیا یې په داسې حال کې پر څلور پرله پسې ډزې کړي چې هغه تر پښو لاندې و.
دا پېښه په داسې حال کې لا ډېره حساسه شوې چې مقتول یو مسلکي نرس و او د وسلې د ګرځولو قانوني اجازه یې هم لرله، خو کارپوهان وايي چې په ویډیو کې د هغه لخوا د کوم ګواښ نښه نه لیدل کېږي.
د مینیسوټا ایالت والي ټیم والز او د مینیاپولیس د پولیسو مشر براین اوهارا د حکومت دا ادعاوې “ځورونکې” او “دروغ” بللي او ویلي یې دي چې فدرالي مامورین ایالتي پولیسو ته اجازه نه ورکوي چې د پېښې ځای په خپله وڅېړي، چې دې کار د ایالتي او فدرالي حکومتونو ترمنځ سخت ترینګلتیا رامنځته کړې ده.
په ورته وخت کې، پخواني ولسمشر بارک اوباما او د بشري حقونو فعالانو دا وژنه په کلکه غندلې او د ټرمپ په اداره یې تور پورې کړی چې د کډوالو د اېستلو په پلمه یې په ښارونو کې وحشت خپور کړی دی.
