طالبانو په یوه خبرپاڼه کې د ۱۳ کسانو د ګمارلو اعلان کړی، چې د وزارتونو د مرستیالانو تر څنګ یې په نظامي او امنیتي څانګو کې هم په دنده ګمارل شوي، خو په دوى ټول کسان د طالبانو پخواني چارواکي دي او په منځ کې یې هیڅ نوې څېره نشته.
د طالبانو د خبرپاڼې پر بنسټ، په دغو ګمارنو کې درې تنه د طالبانو تر ادارې لاندې د عامې روغتیا، د ټولګټو او کلیو پراختیا وزارتونو معينان دي.
درې تنه نورې يې د کندز، غور او ننګرهار لپاره د طالبانو د واليانو په توګه ټاکل شوي دي.
څلور نور تنه نور د کاپیسا، غور، جوزجان او بادغیس ولایتونو لپاره د طالبانو د امنیه قوماندانانو په توګه ټاکل شوي دي.
یو له هغو څخه د طالبانو د البدر قول اردو د قومندان ټاکل دي.
دغه راز د دغې خبرپاڼې پربنسټ، په وروستیو دوو مواردو کې د طالبانو تر ادارې لاندې د کرنې وزارت د بشري سرچينو د رئیس ټاکل او د طالبانو تر ادارې لاندې د مرکزي دارالافتاء د غړي په توګه د یوه کس ټاکل شامل دي.
د طالبانو د خبرپاڼې پر بنسټ:
طالبانو د ټولګټو وزارت د رېل پټلۍ پخوانی معين بخت الرحمن شرافت د طالبانو لخوا د ټولګټو وزارت د مالي او اداري معين په توګه وټاکل شو.
د طالبانو تر ادارې لاندې د افغانستان د عامې روغتیا وزارت پخوانی مالي او اداري معين محمد اسحاق صاحبزاده د ټولګټو وزارت د مرستیال په توګه وټاکل شو.
د کندز پخوانی والي نثار احمد نصرت د طالبانو تر ادارې لاندې د کلیو د بیارغونې او پراختیا وزارت د کلیو د پراختیا او بیارغونې د مرستیال په توګه وټاکل شو.
د طالبانو د ۲۰۵ اتل قول اردو پخوانی قومندان محمد خان دعوت د کندز ولايت لپاره د طالبانو د والي په توګه وټاکل شو.
د هلمند ولایت د ګرشک ولسوالۍ لپاره د طالبانو پخوانی ولسوال حیات الله مبارک د غور ولایت د والي په توګه وټاکل شو.
په غور کې د طالبانو پخوانی والي احمدشاه ديندوست د طالبانو د ۲۰۵ بدر قول اردو د قومندان په توګه وټاکل شو.
د طالبانو له تر واک لاندې د کرنې، اوبولګولو او مالدارۍ وزارت د بشري منابعو پخوانی رئیس عبدالولي اتقاني په جوزجان ولایت کې د طالبانو د پولیسو د قومندان په توګه وټاکل شو.
د هلمند ولایت د موسی کلا ولسوالۍ پخوانی امنیه قومندان عبدالسلام حسیني د کاپیسا ولایت د امنیه قومندان په توګه ټاکل شوی دی.
د بادغیس ولایت د امنیه قومندانۍ پخوانی امنیه قومندان نورآقا حیدر د غور ولایت د امنیه قومندان په توګه وټاکل شو.
په جوزجان ولایت کې د طالبانو پخوانی امنیه قوماندان حفیظ الله پهلوان د بادغیس ولایت د امنیه قوماندانۍ لپاره د طالبانو د امنیت امر په توګه ټاکل شوی دی.
په ننګرهار ولایت کې د طالبانو د پوهنې پخوانی رٸیس عزیزالله مصطفی په دغه ولایت کې د طالبانو د مرستیال والي په توګه وټاکل شو.
په کاپیسا ولایت کې د طالبانو پخوانی قومندان محمد عثمان د طالبانو له خوا د کرنې، اوبولګولو او مالدارۍ وزارت د بشري منابعو د رئیس په توګه وټاکل شو.
د طالبانو د بهرنیو چارو وزارت پخوانی مالي او اداري معين رحمت الحق فضيل د طالبانو د مرکزي دارالافتا د غړي په توګه وټاکل شو.
دا په داسې حال کې ده، چې په تېرو درېیو کلونو کې د طالبانو تر ادارې لاندې په دولتي بستونو کې ټولې نوې تعيينات، تغییرات، بدلونونه، ګمارنې او ټاکنې د طالبانو له غړو پرته بل چا لپاره نه وو.
