د افغانستان مشهور هنرمند او کمیډین عبدالاحمد خاکسار چې پر یوې ناروغۍ اخته و، نن دوشنبه په ۶۷ کاله عمر کابل کې ومړ.
د عبدالاحمد خاکسار یوه خپلوان آمو ته د هغه د مړینې خبر تایید کړ.
ښاغلي خاکسار په بېلابېلو ټلویزیوني پروګرامونو او فلمونو کې رول لوبولی و.
د هنرمند په توګه د هغه لومړنی کار په ۱۳۶۱ کال کې په ملي ټلویزیون کې پیل شو.
هغه د فارسي ادبیاتو په برخه کې زدهکړې کړې وې او همداراز د کابل په عبدالهادي داوي لېسه کې ښوونکی و.
ښاغلي خاکسار تر ۴۰ کلونو زیاته موده د افغانستان د تیاتر او سینما په برخه کې کار وکړ.
