یو شمېر صرافانو په کابل کې آمو ته ویلي چې طالبانو د دوو ورځو راهیسې په سرای شهزاده کې د نرخ ټاکلو (بولۍ) پروسه درولې ده.
د سرچینو په وینا، د طالبانو ځواکونو د یکشنبې په ماښام سرای شهزاده او سرای حیدري ته په مندوي کې ورغلي او له لسو ډېر صرافان یې نېولي دي.
دغه صرافان وایي چې طالبانو د صرافانو هغه واټسآپ او ټېلېګرام ګروپونه هم بند کړي دي چې د هماهنګۍ او د اسعارو د نرخ ټاکلو لپاره کارېدل.
د سرچینو په وینا، طالبانو خبرداری ورکړی چې صرافان د اسعارو د نرخ ټاکلو حق نه لري او دا یوازې د مرکزي بانک دنده ده.
صرافان ادعا کوي چې طالبان د مالي سرچینو د کموالي له امله په بازار کې ډالر نشي وړاندې کولای او غواړي د فشار له لارې بازار تر خپل کنټرول لاندې راولي.
د طالبانو تر واک لاندې مرکزي بانک په یوه خبرپاڼه کې ویلي، چې د دې بانک د سرپرست نور احمد آغا په مشرۍ د صرافانو د اتحادیې له استازو سره غونډه شوې ده. په دې غونډه کې د افغاني ارزښت ساتنې، د احتکار مخنیوي او د اسعارو د قاچاق په اړه خبرې شوې دي.
په خبرپاڼه کې راغلي: «دا بانک د خپلو قانوني او ملي مسئولیتونو په چوکاټ کې په بشپړ ژمنتیا هڅه کوي چې د هېواد اقتصادي ثبات، د افغاني ارزښت ساتنه او د قیمتونو ثبات تأمين کړي.»
په همدې حال کې، د افغانيو ارزښت د ډالرو په وړاندې بېساري کموالی تجربه کوي. د امریکا د مخکیني ولسمشر ډونلډ ټرمپ د فرمان له مخې د دې هېواد بهرني مرستې، په ځانګړي ډول له افغانستان سره، بندې شوې دي.
د دې پرېکړې په تعقیب، د یکشنبې په ورځ د افغاني ارزښت په څرګند ډول کم شو، او هر ډالر له ۸۰ افغانیو څخه لوړ پلورل کېږي. دغه نرخ لا هم د بدلون په حال کې دی.
